Abro Fernande Vs Guardarshan Mangat. Foto espesiál

DILI, 15 jullu 2019 (TATOLI)—Se lakon (frakasu) ne’e hanesan “udan” no “vitória” ne’e hanesan loromatan, mak presiza duni “udan” no “loromatan” atu haree baur (arkiiris).

Sentimentu satisfasaun hetan vitória mak bainhira ema ida hadau vitória ne’e liuhusi dalan lakon (frakasu=kegagalan). Sentimentu ka situasaun ida ne’e mak akontese ba atleta Mixed Martial Arts (MMA), Abro Fernandes, ne’ebé reprezenta Timor-Leste no Indonézia bainhira ba tuir eventu internasionál no fight iha MMA One Championship iha Sudueste Aziátiku, iha Kuala Lumpur, Malázia ne’ebé atu hada’u sintu Flywight ho todan 61,2kg.

Mehi atu manan la sai realidade. Iha ninia fight (luta) ho atleta Mixed Martial Arts (MMA) husi India, Guardarshan Mangat, ne’ebé realiza iha sesta (12/7/2019) iha Kuala Lumpur, Malázia, Abro Fernandes labele hetan vitória tanba de’it ninia adversáriu agresivu liu, manan esperiénsia, estratéjia di’ak no manan ho valór mihis.

“Loos! Ha’u lakon iha estratéjia. Ha’u sente kontente tanba hatudu ona jogu ne’ebé entertain maske ha’u lakon point (pontu). Nia manan ho angka (númeru) tanba nia agresivu liu ha’u. Ha’u akui (rekoñese) nia tebe di’ak no ás liu ha’u maske ami todan hanesan. Ida tan, nia manan tanba ain-ás no liman naruk,” dehan Abro Fernandes ba Ajénsia TATOLI liuhusi entrevista via rede sosiál, segunda (15/7/2019).

Iha lakon ne’e nia kotuk, tuir Abro Fernandes, nia hetan benefísiu rua mak sai nu’udar esperiénsia foun ba nia mak oinsá aprende deskobre meiu seluk no benefísiu atu hametin ninia mentál.  Ho hanoin ida katak bainhira hadeer husi lakon ne’e, nia iha ona kapitál (modal) ne’ebé liu ida ne’e mak perspetiva no badaen foun, no mós mentál no fiar-án ne’ebé forte liután.

“Nia iha esperiénsia barak liu ha’u. Depois nia team (ekipa) ne’ebé foti iha Xtreme Couture/tinan 10 iha Planet Las Vegas, Amérika. Maske ha’u lakon, ha’u sente kontente nafatin tanba ha’u hetan eperiénsia foun husi jogu ne’e,” Abro hateten.

Ho esportividade ne’ebé nia iha, hafoin juri deside katak nia lakon iha fight ne’e, nu’udar ema, nia hakerek kedas ninia sentimentu “lakon” ne’e liuhusi ninia varanda rede sosiál (facebook); Deskulpa ba belun sira hotu, sorte-di’ak seidauk monu ba ha’u. Ba oin, ha’u sei esforsu-án treinu sai di’ak liután. Espera katak, ba fight tuir mai, ha’u bele lori vitória ba Timor-Leste no Indonézia. Obrigadu ba belun sira hotu. Agradese ba Maromak tanba sei fó mai ha’u sauúde di’ak no la hetan kanek-todan hodi nune’e ha’u bele treinu fila fali hanesan babain.

Abro Fernandes fila hikas mai iha Indonézia, iha sábadu (13/7/2019). Husi Jakarta nia aranka ba nia hela fatin Solo, Java Sentrál, Indonézia, iha tuku 19.00 kalan. Deskansa loron balun, iha loron ohin (segunda, 15 jullu 2019), nia hahú hikas ninia treinu hanesan baibain hodi prepara ba fight tuir mai ne’ebé sei akontese iha Jakarta, Indonézia, iha 26 outubru 2019 ne’ebé sei mai.

“Iha fulan outubru, ha’u sei fight tan. Tanba eventu One Champinship  ne’e rotativa iha Ázia Pasífiku, entaun ohin ha’u treinu fali para bele atende eventu sira ne’ebé sei akontese iha fulan outubru oin mai. Ha’u tenke aprende ho ha’u-nia lakon ne’e. Lakon ne’e hanesan susesu ida ne’ebé adia tiha ba loron aban. Lakon ne’e normál. Só Maromak mak nunka lakon,” dehan Abro Fernandes ho fiar-án hodi la dehan sai, atleta MMA sé loos maka nia sei kontra no husi nasaun ne’ebé.

Notísia relevante: http://www.tatoli.tl/2019/07/abro-fernandes-hau-prontu-atu-manan/

Jornalista       : Cancio Ximenes

Editór             : Rafy Belo

HAKEREK NO HATÁN

Please enter your comment!
Please enter your name here