DILI, 14 jullu 2019 (TATOLI)– Governu Timor-Leste (TL) reprezenta husi Sekretáriu Estadu Kooperativa (SEKoop) promove produtu lokál TL nian hanesan kafé Timór, mina nú, mina virjen, mina kompri, sabaun husi mina nú, sabaun aidila, kraviñu, jenjibre no tais TL iha Ezpozisaun Ázia Pasífiku iha Sidade Auckland, Nova Zelándia.

Reprezentante TL lidera husi SEKoop, Arsenio Pereira da Silva hamutuk ho nia ekipa delegasaun aprezenta produtu hirak ne’e hodi nune’e nasaun sira iha rejiaun Ázia Pasífiku bele kuiñese di’ak liután kona-ba TL ninia produtu orijinál sira.

Tema prinsipál ba eventu ne’e mak “Dezenvolvimentu ba Turizmu, Komérsiu no Investimentu iha rejiaun pasífiku”. Expo ne’e hala’o durante loron ha’at nia laran hahú loron 11 to’o 14 fulan jullu tinan 2019. Ba loron dahuluk hala’o fórum kona-ba turizmu Ázia Pasífiku nian, loron daruak foin mak ofisialmente loke expozisaun refere no ezpo ramata iha domingu, ohin (14/07/2019).

Ezpozisaun Ázia Pasíku tinan 2019 hanesan mós momentu istória ba nasaun sira iha rejiaun Pasífika atu bele hateke ba oin no serbisu hamutuk sai ida de´it iha Rejiaun Pasífiku nian.

Iha ezpozisaun ne´e, xefe delegasaun, atuál Sekretáriu Estadu Kooperativa, Arsenio Pereira da Silva, hamutuk ho parseiru husi nasaun membru Ázia Pasifiku ofisialmente loke ezposisaun ho utilizasaun matéria kultura “TAMBOR” nu´udar símbolu ba abertura Ezposisaun Ázia Pasífiku ba tinan 2019 nian.

Iha abertura expozisaun Ázia Pasífiku hahú simu ho kultura no tradisaun orijin ema Maoria nian hanesan jestu fó onra ba bainaka sira. Eventu ne’é partisipa husi nasaun sanulu resin sia (19), husi totál nasaun 20 iha Rejiaun Ázia Pasífiku.

Jornalista :Nelson de Sousa

Editór       : Rafy Belo

HAKEREK NO HATÁN

Please enter your comment!
Please enter your name here