Responsável Klínika Privadu Xue Laishu, Vera Kristina Tilman

DILI, 13 jullu 2019 (TATOLI)—Klínika privadu hosi Xue Laishu halo atendimentu di’ak ba pasiente sira ne’ebe hakarak mai konsulta sira-nia saúde.

Aimoruk hirak ne’ebé fa’an iha Klínika Privadu Xue Laishu

“Ami-nia atendimentu ba pasiente di’ak tebes tanba ami kuida pasiente no halo tuir pasiente sira-nia hakarak. Dalaruma pasiente mai barak no dalaruma mai uituan. Depende ba pasiente sira. Ami simu pasiente sira hahú hosi dadeer tuku 9 to’o kalan tuku 7,” hateten responsável Klínika Privadu Xue Laishu, Vera Kristina Tilman, ba Agência Tatoli iha Fatuhada, Dili, sábadu (13/7).

 Aimoruk ne’ebe fa’an iha klínika refere, nia haktuir, konsumu ba tempu udan no bailoron nian. Uza ba tempu udan nian mak hanesan aimoruk ba inus been no isin manas. Ba bailoron nian mak aimoruk ba me’ar no isin katar.

Vera afirma katak aimoruk hirak ne’e sira importa hosi Apotik Moris Foun no Foho Osan Mean mak hanesan aimoruk sangobion (aumenta ran), paramex (ba ulun moras nian) no condiding (ba mear) no uza mós aimoruk Xina maibe uza ba moras interna, moras mane, moras feto no mós USG (ba moras laran nian).

“Agora USG ami labele uza lai  tanba seidauk iha lisensa hosi Ministériu Saúde. Hanesan ba konsulta, sona, fó aimoruk, ne’e ami bele,” nia esplika.

Klínika refere simu rejistu ho osan $5. Kustu ba konsulta maka hanesan $39, $48 no 49 kada ema, depende ba pasiente nia moras.

Entretantu, Klínika privadu ne’e, nia na’in hosi Xina. Ema ne’ebe serbisu iha klínika refere hamutuk na’in tolu inklui klínika na’in.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here