Guarda rede AS Ponta Leste tuda-án atu salva bola hosi avansadu Lalenok United iha Estádiu Munisipál Dili, ohin. Imajen Agência Tatoli/Hortençio Sanchez

DILI, 13 jullu 2019 (TATOLI)—Ekipa Lalenok United FC liki AS Ponta Leste ho golu 2-0 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin.

Golu rua hosi Lalenok prodúz hosi Yohanes Gusmão (12) iha minutu 45 no Italo Pimentel (28) iha minutu 60. Jogu ekipa rua nian mak loke odamatan ba jornada 6.

Maski hela klube barak mak seidauk joga maibé só Boavista FC Timor mak sei iha oportunidade bele duni tuir Lalenok hodi lidera tabela klasifikasaun provizória iha jogu primeira volta. Maski nune’e, iha jogu Boavista nian hasoru AD SLB Laulara iha semana tuir mai, nia (Boavista) tenke manán ho rezultadu 4-0 hafoin bele dudu sees Lalenok hosi tabele klasifikasaun.

Treinadór Lalenok United, Yance Matmey hateten nia sente kontente no agradese ba Maromak tanba Lalenok besik ona atu lidera tabela klasifikasaun iha jogu primeira volta.

“Ohin jogu kapa’as tebes. Ha’u agradese ba Maromak tanba ami bele manán. Ha’u fiar manán ida ne’e sei to’o Liga ne’e ramata. Ha’u agradese mós ba jogadór sira hotu ne’ebé disiplina hodi halo tuir orientasaun ne’ebé ha’u fó,” tenik Yance.

Nia dehan, bainhira tama ba jogu segunda volta, nia tenke esforsu maka’as liu-tan nune’e bele lori Lalenok kampiaun iha époka ida ne’e.

Iha sorin seluk, treinadór AS Ponta Leste, Eduardo Pereira informa sira lakon tanba jogadór prinsipál na’in rua la tuun. “Ami ohin lakon ne’e tanba jogadór prinsipál rua la tuun. Ami ohin koko atu halo impata jogu ne’e maibé la konsege. Maibé, ha’u sei hadi’a iha jogu tuir mai,” katak Eduardo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here