Foto/Google.

DILI,13 jullu 2019 (TATOLI)– Banku Nasiónal Komérsiu Timor-Leste (BNCTL sigla-portugés) planea sei estabelese nia ajénsia iha postu administrativu sira hotu iha territóriu Timor-Leste (TL) hodi presta nia servisu ba públiku.

Prezidente Konsellu Administrasaun BNCTL, Brigido de Sousa. Imajen Egas Cristovao

“Ami agora hala’o survey (peskiza) hotu ona, sei halo analiza. Se buat hotu la’o di’ak, sistema hotu monta hotu ona antes fin-do-ano bele estabelese ona ajénsia BNCTL iha postu administrativu hotu iha territóriu laran. Liu husi Ajénsia ne’e lori besik banku nia sanak ba to’o komunidade sira,” informa Prezidente konsellu Administrasaun BNCTL, Brígido de Sousa ba Ajénsia TATOLI iha salaun enkontru SEFOPE Kaikoli, sexta (12/07/19).

Nia esplika, ajénsia ne’e sei fornese atentimentu ba pagamentu; ema foti osan ka rai osan no bele kompras uza kartaun BNCTL nian.”Husi meius ida ne’e bele fasilita liután funsionáriu públiku sira foti saláriu iha postu administrativu, sira la presiza foti osan mai to’o munisípiu, fasilita ferik, katuas sira (idozu) no komunidade hotu,” hateten prezidente BNCTL ne’e.

Prezidente Brígido de Sousa informa tan katak ajénsia BNCTL nian sira ne’e, husi peskiza sira ne’ebé mak BNCTL halo mak iha fatin hanesan loja, pertamina, fatin fa’an pulsa (kréditu) eletrisidade, iha postu administrativu no suku sira para sira bele sai ajénsia BNCTL nian.

Nia mós haktuir, durante ne’e BNCTL uza de’it banku movel to’o iha área remota sira maibé ho ajénsia sira ne’e bele fasilita liután ema barak hodi benefísia. Tuir planu, ajénsia BNCTL nian sira ne’e sei estabelese uluk iha postu administrativu sira iha teritóriu laran no ba suku sira karik iha nesesidade bele estabelese.

Jornalista :Nelson de Sousa

Editór. : Rafy Belo

HAKEREK NO HATÁN

Please enter your comment!
Please enter your name here