Lixu ne'ebé la tau iha nia fatin, iha Kristu Rei.

DILI, 12 jullu 2019 (2019)—Autoridade Munisipál Dili (AMD), sesta (12/7), hala’o limpeza nu’udar preparasaun ida ba komemorasaun tinan 20 loron Konsulta Populár (Referendu) ne’ebé monu iha 30 agustu.

“Objetivu ba limpeza ida ne’e halai ba loron konsulta populár. Ho ida ne’e mak hosi Autoridade Munisipál Dili no Ministériu Estatal konvoka limpeza jerál ida, liliu iha fatin tolu,” Xefe Departamentu Saneamentu Dili, Domingos dos Santos Soriano ba Agência Tatoli, iha Tasi Tolu, Dili.

Nia hatutan katak atividade limpeza ne’e inklui mós instituisaun Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), autoridade lokál sira no mós estudante sira.

Domingos esplika katak programa limpeza jerál ne’e sei hala’o iha semana-semana, ne’ebé hala’o iha fatin tolu maka hanesan iha Sentru Konvensaun Dili (CCD-sigla portugés), área Kristu Rei no Tasi-Tolu.

“Programa limpeza jerál ne’e ami fahe ba grupu tolu mak hanesan balun iha Kristu Rei, grupu balun iha CCD no Tasi Tolu,” nia haktuir.

Tuir observasaun Agência Tatoli katak atividade limpeza jerál ne’e ninia alvu mak hamoos lixu hanesan plástiku, ákua, botir, ho mós aitahan sira ra’ut tau hamutuk hodi tau ba iha kareta ba soe iha Tibar.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here