Treinadór Karketu, Haryadi Hengkan (liman karuk taka sapeu), akompaña hosi nia asistente treinadór, António Timótio, iha konferénsia ba imprensa ne’ebé hala’o iha salaun FFTL, ohin. Imajen Agência Tatoli/Hortençio Sanchez

DILI, 13 jullu 2019 (TATOLI)—Ekipa Assalam FC no Karketu Dili FC sei hasoru malu iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, aban (14/7).

Sé loos mak atu manán, seidauk bele hatene tanba armada rua nia forsa kuaze hanesan. Treinadór Assalam, Andi Susanto afirma foin primeiru hamutuk ho Assalam maibé nia fiar-án sei lori Assalam hetan pontu tolu.

“Ha’u foin ba hamutuk ho Assalam. Uluk treinadór Francisco de Araújo mak kaer maibé jestoriál klube fó ona konfiansa mai ha’u, ha’u sei lori Assalam hetan rezultadu di’ak,” tenik Andi iha konferénsia imprensa ne’ebé hala’o iha salaun Federasaun Futeból Timor-Leste (FFTL), Bairru Formosa, Dili, ohin.

Treinadór Assalam FC, Andi Susanto

Iha fatin hanesan, treinadór Karketu, Haryadi Hengkang hateten ekipa ne’ebé nia lidera sei iha difikuldade ba jogadór. Tuir nia, maski jogadór la sufisiente maibé nia kontinua esforsu atu hetan pontu tolu iha jogu aban.

“Ami-nia jogadór seidauk sufisiente maibé ha’u fiar jogadór sira aban sei hatudu jogu ne’ebé di’ak. Iha jogu segunda volta ne’e, ami tenke prepara tan jogadór hamutuk ualu (8) hanesan ne’e ha’u hanoin Karketu bele sa’e fali,” nia argumenta.

Nia haktuir, Karketu falla iha liña klaran (médiu), avansadu estremu direitu, eskerda no defeza. Tanba ne’e, janela transferénsia loke, Karketu tenke buka lalais jogadór ne’ebé kualidade nune’e bele sees hosi zona dezpromosaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here