Reprezentante Uniaun Nasional Eskuteru, Nelia da Silva Maia kualia ba Jornalista sira iha Palasiu Prezidensial Bairo-Pite Dili. Imajen/Agapito dos Santos

DILI, 12 jullu 2019 (TATOLI)-Membru Uniaun Nasionál Eskuteiru Timor Leste (UNE-TL)   hamutuk na’in 14, domingu (14/07/2019), arranka ba partisipa jamboree  mundiál iha Estadu Unidu Amérika (EUA).

Kontinjente Lafaek  ne’e sei ba halibur malu ho partisipante jamboree husi nasaun 133 hamutuk ema rihun 30  no kontinjente Lafaek  nia prezensa iha rai Paman Sam husi loron 22 jullu to’o 2 agostu 2019 no sei to’o fali iha Rai Lorosa’e iha loron 5 agostu 2019.

Paman Sam ne’e termu ne’ebé saran ba nasaun Estadu Unidus Amérika (EUA) iha tempu funu entre tinan 1812. Termu ne’e foti husi Samuel Wilson nia naran. Nia hanesan fornesedór na’an ba forsa Amérika sira iha abrigu laran, tempu ne’ebá,  hodi nune’e forsa Estadu Unidu Amerika sira halo sigla tiha Samuel Wilson nia naran  Uncle Sam (Paman Sam/Tiu Sam).

“Timor Leste delega  kontinjente hamutuk  na’in 14, kompostu husi esploradores na’in 10 (feto na’in haat no mane neen), ho dirijente na’in haat,” hateten Prezidente UNE-TL, Idelta Maria Rodrigues, ba jornalista sira, ohin, hafoin aprezenta programa ne’e ba Prezidente Repúblika, Francisco Guterres Lu Olo, iha Palásiu Prezidensiál, Bairru-Pité, Dili.

Iha tinan 2015, reprezentante membru  UNE-TL hamutuk na’in ualu kompostu hosi esploradores na’in haat no dirijente na’in haat partisipa ona eventu mundiál ne’e iha Japaun, nu’udar bainaka tanba Timor-Leste foin ofisiálmente sai membru ba organizasaun ne’e iha 2017.

Durante  iha Amérika, joven na’in 10 no dirijente na’in  haat ne’e sei partisipa atividade sosiál, marítima, turizmu no seluk tan ne’ebé sai ona kultura eskutizmu ne’ebé implementa iha nivel rejionál no mundiál.

Joven presiza iha koñesimentu, atu serbisu iha ekipa, respeita malu, ko’alia iha públiku hodi sai lideransa di’ak, entaun tanba ne’e iha eskutizmu iha grau lubuk ida hanesan lobítus, esploradores, kaminerus, pioneiru,” esplika Idelta Rodrigues.

Partisipante ne’ebé sei arranka ba Estadu Unidus Amérika reprezentante husi munisípiu Baucau, Aileu, Ainaro, Bobonaro, Viqueque no mós Dili, enkuantu munisípiu seluk la partisipa tanba problema menus orsamentu.Daudaun ne’etotal membru UNE-TL iha territóriu laran, hamutuk ema rihun 11.

Jornalista         : Agapito dos Santos

Editór               : Francisco Simões

HAKEREK NO HATÁN

Please enter your comment!
Please enter your name here