Ministru Negósiu Estranjeirus no Kooperasaun Dionísio da Costa Babo Soares. Imajen: António Gonçalves

DILI, 12 jullu 2019 (TATOLI) – Estadu Timor-Leste liuhosi Ministru Negosiu Estranjeiru no Kooperasaun (MNEK), Dionísio Babo Soares, husu ba timoroan hotu, liuliu iha estranjeiru atu atensaun ba dokumentu sira bainhira halo planu ba viajen.

“Husu timoroan sira iha estranjeiru check passaporte antes fulan neen remata, tenke renova”, apela ministru ne’ebé halo hela viajen servisu Estadu iha Nova Iorke, ba TATOLI liuhosi messenger, kalan ne’e.

Nia husu ba timoroan hotu atu koopera. “Se-lae ita bele lakon osan no mós ema kaer ita, tanba kontra lei. Hotu-hotu tenke la’o ho dokumentu legál ne’ebé válidu”.

Nia akresenta passaporte komun Timor nian, ministériu justisa mak bele prodús no emite iha Dili.

Ministru esplika, embaixada Timor-Leste iha rai-liur bele fó dokumentu viajen kuandu passaporte la válidu ona, maibé tenke iha razaun ne’ebé forte.

“Normalmente, se passaporte lakon ka ahi-han embaixada Timor bele fasilita dokumentu viajen (travel document), maibé ne’e la garante, tanba lei Imigrasaun rai ida-idak nian la hanesan”, afirma.

Katak tan, kuandu hela liu ona prazu VISA nian, bele iha tiket ou dokumentu viajen, tuir ema nian lei imigrasaun, konsidera hela ho ilegalmente (overstay).

“Imigrasaun ema nian sei la husik ita liu no sei kaer ema ne’ebé overstay (hela liu prazu visa) hodi selu multa no responde krime tuir sira nian lei imigrasaun”, realsa.

Relasiona ho kazu Martalena da Costa ne’ebé imigrasaun Indonézia iha aeroportu Bali deporta ba Malázia, tanba lori de’it dokumentu viajen (travel document) hosi embaixada Timor iha Londres.

“Señora ne’e passaporte mate kleur ona, la fila Timor no husu travel document iha embaixada Timor iha London, maibé hola billete fila, la trata visa ba Indonézia, imigrasaun Indonézia husu nia hatudu fali kartaun RESIDENTE iha Inglaterra”.

Martalena halo viajen hosi Inglaterra mai Timor ho pasaporte RDTL invalidu.

“Lei imigrasaun Indonézia nian tenke deporta fali, tanba laiha dokumentu (passaporte)”.

Tuir informasaun, ministru Babo haktuir bainhira to’o iha Malázia, nia labele ba liu tanba kompañia aviaun lakohi tula fali ba Inglaterra.

“Tanba ne’e maka ema konsidera hanesan stateless (laiha sidadania)”, katak tan.

Tuir loloos, nia dehan lei imigrasaun Malázia nian bele kastigu tanba kontra lei.

Jornalista: Rita Almeida

Editór: Rafael Belo

Kazu Martalena, MNEK Kongratula Reprezentante Estadu TL iha Malázia-Bali

HAKEREK NO HATÁN

Please enter your comment!
Please enter your name here