Foto hamutuk Sekretáriu Estadu, Julião da Silva ho Prezidente BNCTL, Brígido de Sousa inklui kargu xefia sira hafoin ramata asina MoU. Foto TATOLI: Nelson de Sousa

DILI, 12 jullu 2019 (TATOLI)-Sekretária Estadu Formasaun Profisionál no Empregu (SEFOPE) ho Banku Nasionál Komérsiu Timor-Leste (BNCTL-sigla portugés) ohin (12/07/19) asina Nota Intendimentu (MoU-Memorandum of Understanding) iha salaun enkontru SEFOPE, Kaikoli, sesta (12/07/19).

Objetivu husi asina nota entre instituisaun rua ne´e hodi fasilita timoroan sira ne´ebé mak serbisu iha estranjeiru inkluzivamente Korea Sul no Austrália. Katak, bainhira osan tikete (visa) no selu asuránsia la iha, bele kréditu ho funan ne´ebé mak ki´ik iha BNCTL. Alende ne´e mós ajuda  traballadór timoroan sira bele transfere osan  fila mai Timór liuhusi BNCTL.

Diretór Jerál SEFOPE, Paulo Alves. Imajen/Egas Cristovão

“Sorumutu asina (MoU) entre SEFOPE ho BNCTL ohin ne’e importante tebes oinsa atu bele fasilita ita-nia traballador timoroan ne’ebé serbisu iha Korea, Austrália nune’e mós ba kandidatu traballadór ne’ebe foin atu ba,” informa Diretór Jerál SEFOPE, Paul Alves, ba profisionál komunikasaun sosiál sira hafoin ramata asina MoU ne´e.

Nia hatutan, polítika asina MoU entre instituisaun rua ne´e atu nune´e traballadór sira ba serbisu iha rai li´ur bele fila fali mai sira sente nafatin sira-nia osan ne’e iha. “Sela’e balun ba serbisu tiha iha ne’ebá manan tiha osan fila mai osan la iha tanba osan hotu ona. Estudu no akompañamentu  ne’ebe hatudu, ita-nia traballadór sira barak mak  serbisu ho susesu maibé balun fila mai osan laiha”.

“Ita-nia polítika asina akordu ona entre SEFOPE ho BNCTL, ba oin SEFOPE sei halo deklarasaun ida ho traballador sira katak sira ba iha ne’ebá só simu osan pursentu 15 iha ne’ebá (Korea Sul no Austrália) no pursentu  85 fila mai mak simu iha Timór,” reforsa Diretór Jerál SEFOPE ne´e.

Hodi hatutan: “ Tanbasá? faktus hatudu katak traballadór balun ba serbisu iha ne’ebá kle´ur fila mai Timór osan laiha tanba gasta hotu ona. Ho nune’e, ita halo polítika ida ne’e hodi asegura osan ne’ebé  sira hetan husi rai li´ur liliu iha Korea Sul ho Austrália”.

Diretór Jerál SEFOPE, Paul Alves akresenta mós katak SEFOPE mós sei ko’alia ho família traballadór sira nian oinsa bele asesu saláriu pursentu 85 ne’ebé mak traballadór sira haruka mai Timór no hira mak bele asesu hodi nune’e labele gasta hotu.

“Nune’e bele poupa iha banku, tempu traballadór sira fila mai Timór, osan ne’e sai hanesan kapitál (modal) hodi fali halo negósiu ruma atu bele benefísia ekonomia família,” nia haklaken.

Iha fatin hanesan, Prezidente Konsellu Administrasaun BNCTL, Brígido de Sousa hateten, liuhusi kooperasaun  ne’e permite  BNCTL atu presta servisu ba SEFOPE no mós serbisu na´in timoroan sira iha Korea ho Austrália.

Entretantu, asinatura MoU entre SEFOPE ho BNCTL partisipa no asiste direta husi Sekretáriu Estadu Formasaun Profisionál no Empregu, Julião da Silva.

Jornalista        : Nelson de Sousa

Editór              : Rafy Belo

HAKEREK NO HATÁN

Please enter your comment!
Please enter your name here