Vendedór ambulante fa’an sasán iha dalan públiku. Imajen espesiál

DILI, 11 jullu 2019 (TATOLI)—Provedoria Direitu Umanu no Justisa (PDHJ-sigla portugés), sei promove mediasaun no konsiliasaun entre vendedór ambulante ho Autoridade Munisipál Dili relasiona ho medida muda vendedór ambulante sira ne’ebé fa’an iha dalan públiku.

“Mediasaun no konsiliasaun nia objetivu atu bele iha konkordánsia entre vendedór ambulante ho Autoridade Munisipál Dili, nune’e futuru bele iha entendimentu entre vendedór ambulante no Autoridade Munisipál Dili iha ámbitu implementasaun regra,” Adjuntu Provedór Direitu Umanu no Justisa ba asuntu Boa Governasaun, Miguel Pereira de Carvalho ba Agência Tatoli iha nia kna’ar fatin, Caicoli, Dili, kinta (11/07/2919).

PDHJ rekomenda ba governu tenke prepara fasilidade sira ka fatin ba vendedór ambulante sira atu hala’o sira-nia atividade no seluk tan mak governu tenke prepara lejizlasaun ba vendedór ambulante sira.

“PDHJ sei haruka karta ba Autoridade Munisipál Dili atu informa kona-ba bainhira governu foti medida tenke mós konsidera direitu umanu sidadaun sira nian ne’ebé mak hela iha área ida ne’ebá (dala públiku),” nia subliña.

Antes ne’e, Governu liuhusi Autoridade Munisipál Dili muda vendedór sira ne’ebé halo negósiu iha tasi ibun Lecidere no fatin seluk tan mai iha Caicoli, Antigu Edifísiu Finansa iha tempu Indonézia, ho intensaun atu ordena kapitál tuir regra.

“Ita lahatene, intensaun Governu nian halo mudansa ne’e oinsá. Katak, mudansa temporáriu atu garante de’it ambiente moos ba Komemorasaun Tinan 20 Referendu, ka mudansa ne’e ba tempu naruk. Kestaun ba tempu naruk ne’e mak kestaun prinsipál hosi PDHJ nian,” Adjuntu Provedór ne’e haklaken.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here