iklan

NASIONÁL, DILI

MOP Planu Hadi’a Sistema Kanalizasaun Bee-Moos

MOP Planu Hadi’a Sistema Kanalizasaun Bee-Moos

Ekipa Task Force DNSAS hadi’a Kanalizasaun bee-moos. Imajen MOP-DNSAS

DILI, 12 jullu 2019 (TATOLI)—Atu garante komunidade asesu ba bee-moos, Ministériu Obra Públika (MOP) liuhusi  Diresaun Nasionál Serbisu Água no Saneamentu (SAS) planu hadi’a no mellora sistema kanalizasaun bee-moos iha estrada okos sira iha Kapitál Dili.

Diretór Jerál Serbisu Agua no Saneamentu, Gustavo da Cruz, tenik iha ona planu atu rekruta konsultór internasionál sira hodi hala’o mapeamentu no dezeñu detallu ba kanalizasaun  kanu bee-moos sira ne’ebé kuak ona iha estrada okos, molok hadi’a.

 “Ita sei rekruta konsultór internasionál atu mai halo mapa no dezeñu ba kanalizasaun tomak  hodi bele troka tuir identifikasaun dezeñu,” katak Diretór ne’e, ohin, iha nia kna’ar fatin, Caicoli, Dili.

Atu implementa planu ne’e, tuir nia, presiza iha investimentu ne’ebé boot hodi bele hadi’a no mellora kanalizasaun atu komunidade iha Kapitál Dili bele asesu bee-moos ho di’ak.

Entretantu, Xefe Departamentu SAS, Francisco  Pereira, haklaken kanu bee-moos sira ne’ebé kuak iha estrada okos tanba uza tinan naruk ne’ebé feruzen hodi rezulta kuak no nalihun iha estrada.

“Ita kontinua buka meiu atu bele halo operasaun hodi hadi’a fali tanba kanu sira ne’e kle’ur ona iha estrada okos,” katak nia.

Dadaun ne’e, Francisco akresenta, Ekipa Task Force hosi Diresaun Nasionál Serbisu Água (DNSA), Diresaun  Jerál Água no Saneamentu kontinua hala’o manutesaun ba kanu bee-moos iha kada zona iha kapitál Dili.

Ekipa Task Force ne’e hala’o serbisu tanba hetan orietasaun hosi Ministru Obra Públika, Salvador Eugénio Pires, hodi hadi’a no mellora sistema kanalizasaun bee-moos hodi fornese ba komunidade.

Jornalista: Florencio Miranda Ximenes

Editór: Xisto Freitas

iklan
iklan

Leave a Reply

iklan
error: Content is protected !!