DILI, 12 jullu 2019 (TATOLI)—Treinadór Lalenok United FC, Yance Matmey hateten, sira sei la hakfodak joga hasoru armada AS Ponta Leste basaa sira hatene ona pontu fraku ekipa refere.

Lalenok deskobre ona Ponta-Leste nia jogu tanba jogadór prinsipál ne’ebé sai ikon ba Ponta Leste la partisipa joga iha jogu kontinuasaun Primeira Divizaun Liga Futeból Amadora (LFA) jornada (5) ne’ebé sei hala’o iha Estádiu Munisipál Dili, aban lorokraik.

Jogadór prinsipál rua hanesan xave vitória ba Ponta Leste mak hanesan Daniel Donkor (20) no Silveiro Garcia (27). Donkor la joga tanba hetan aleiza. Enkuantu, Garcia hetan akumulasaun kartaun kinur.

“Ita hatene ona frakeza Ponta Leste nian. Iha parte kotuk ladún di’ak. Nia jogadór di’ak mak Dani ho Garcia de’it. Kuandu sira na’in rua (2) la joga, fásil loos ba ami atu manán sira,” tenik Yance ba jornalista liuhosi konferénsia ba imprensa ne’ebé hala’o iha edifísiu LFA, Bairru Formosa, Dili, ohin.

Treinadór ne’e informa, tékniku Lalenok ba jogu aban sei halo barak liu ofensivu—sei la uza defensivu tanba hakarak hadau pontu tolu hosi Ponta Leste.

Iha fatin hanesan, treinadór AS Ponta Leste, Eduardo Pereira konfesa katak maski jogadór prinsipál rua la joga maibé nia garante nafatin jogadór seluk hodi haforsa ekipa Ponta Leste.

“Ami iha difikuldade tanba jogadór na’in rua la joga,” dehan Eduardo. Eduardo informa katak Lalenok ekipa ne’ebé sólidu maibé terminasaun lakon no manán minutu sia-nulu (90) iha kampu laran mak determina.Tékniku jogu Ponta Leste aban sei barak liu halo jogu defensivu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here