DILI, 12 jullu 2019 (TATOLI)—Ministériu Administrasaun Estatal liuhusi Diresaun Jerál Korporativu organiza Deskursu Ba Feto Rurál ho objetivu atu dezenvolve feto rurál sira-nia kapasidade no kriatividade.

“Objetivu hala’o atividade kompetisaun deskursu ba feto rurál  ne’e atu promove no dezenvolve feto rurál nia kapasidade no kriatividade liuhusi atividade kompetisaun entre suku sira hodi hakbiit no motiva feto rurál sira sai feto lideransa iha futuru,” informa Prezidente Komisaun Organizadora no Prezidente Juri ba Kompetisaun Feto Deskursu, Domingos Braganca, ba Agência TATOLI liuhusi entrevista via rede sosiál, sesta ne’e.

Nia hatutan, atividade ne’e hanesan programa nasionál ne’ebé foku ba atividade feto nia abordajen jéneru integradu ne’ebé hala’o iha Postu Administrativu Zumalai, Munisípiu Covalima, iha kuarta (10/7/2019).

Atividade ne’e, tuir Domingos, hanesan prátika igualdade jéneru ne’ebé  bazeia ba tema: “Papél Feto Nian iha Dezenvolvimentu” ne’e, iha relasaun ho sentidu valoriza no dignifika partisipasaun feto nian iha prosesu konstrusaun estadu.

“Ida ne’e fó motivasaun ba feto rurál sira iha postu administrativu, suku no aldeia, oinsá sira-nia papél no kna’ar ba konstrusaun dezenvolvimentu nasionál no mós feto bele hola desizaun iha sira-nia suku, aldeia, bairru no uma-laran rasik liuhusi atividade kriativu ekonomia no partisipasaun iha kompetisaun lideransa lokál,” nia hateten.

Prezidente Juri ne’e informa, grupu feto sira ne’ebé tuir kompetisaun refere hamutuk ema na’in hitu ne’ebé reprezenta suku hitu iha Postu Administrativu Zumalai nia laran. Feto kompetisaun deskursu iha na’in hitu ne’e, iha reprezentante suku ida mak la marka prezensa.

“Iha kompetisaun deskursu ne’e, ida ne’ebé sai vensedora mak Susi Sandra da Silva hosi Suku Lour ne’ebé manán prémiu tasa ida ho osan montante $150, segundu lugár mak Noviana de Jesus Barros hosi Suku Tazhilin  ne’ebé hetan tasa no osan $100, terseiru lugár mak Julieta Luruk hosi Suku Raimea ne’ebé hetan mós tasa no osan $100,” Domingos haktuir.

Entretantu, nia dehan, partisipante feto sira ne’ebé la hetan oportunidade manán prémiu iha kompetisaun ne’e mak Guida Guterres Araújo hosi Suku Zulo, Ivónia Lopez hosi Suku Fatuleto, Domingas Caldas hosi Suku Usecai no Filomena Imaculada Ferreira hosi Suku Mape.

Ekipa juri, nia informa, kompostu hosi ema ida ne’ebé reprezenta nasionál mak Lino de Araújo no reprezentante hosi munisípiu ema na’in rua mak Alípio Magno no Domingos Braganca.

Nia haktuir, iha kompetsisaun ne’e, juri sira halo avaliasaun bazeia ba kritéria avaliasaun hanesan  espresaun, intonasaun, vokál, jestu, kumpri tempu no domina matéria.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here