DILI, 12 jullu 2019 (TAOLI)—Komisaun B, C no D Parlamentu Nasionál (PN) prepara ona ajenda diskusaun alterasaun ba pakote lei haat Fundu Petrolíferu (FP) ne’ebé baixa ona ba Komisaun. Molok atu konklui, Komisaun tolu ne’e sei halo uluk audiénsia ho Xefe Negosiadór Prinsipál Delimitasaun Fronteira Marítima, Kay Rala Xanana Gusmão, hodi rona ninia esplikasaun.

“Ami Komisaun tolu desidi ona sei halo uluk audiénsia ho Xefe Negosiadór, Xanana Gusmão atu rona ninia esplikasaun tanba nia mak ema ida ne’ebé inteira loloos ba asuntu ida ne’e,” Prezidente Komisaun C trata Asuntu Finansa Publika, Maria Fernanda Lay dehan iha Parlamentu Nasionál, ohin.

Nia hateten sira prepara ona konvite atu konvida xefe negosiadór atu hamutuk ho Komisaun nune’e fahe esperiénsia molok Komisaun hala’o ninia serbisu.

Maria Fernanda hatutan Komisaun iha loron rua hala’o audiénsia ho Xanana no konsidera atividade ne’e bele lori tempu naruk uituan tanba ne’e mak presiza inteira iha esplikasaun sira ne’e para bele fasilita Komisaun ninia serbisu ho di’ak liu-tan.

“Aleinde ami konvida Xefe Negosiadór, iha mós konvite ba institituisaun estadu sira ne’ebé mak tutela ho asuntu pakote lei haat ne’e, hanesan Ministériu Finansa no Ministériu Petrolíferu atu partisipa iha audiénsia ne’e,” tenik nia.

Nune’e mós, Prezidente Komisaun  B trata Asuntu Negósiu Estranjeiru, Defeza no Seguransa, Adérito Hugo reforsa katak audiénsia públiku ne’ebé Komisaun tolu ne’e sei halo ho Xefe Negosiadór inklui ministériu relevante sira ne’e atu halo diskusaun kona-ba proposta lei haat refere.

“Ita presiza tau hamutuk hanoin hosi Governu no Xefe Negosiadór nian para depois Komisaun tolu ne’e sei halo fali relatóriu pareser hodi submete ba meza PN depois mak sei hetan aprovasaun jeneralidadede iha plenária,” Hugo esplika.

Tuir nia katak hafoin hetan ona aprovasaun iha jeneralidade, sei baixa fali mai Komisaun tolu ne’e para prepara hakat ba debate espesialidade. Tanba estimasaun kalendáriu debate nian kona-ba aprovasaun globál ne’e entre loron 22 ka 23 jullu tinan ne’e.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here