LIQUIÇA, 12 jullu 2019 (TATOLI)-Premiadu Nobel Dame nian, José Ramos Horta, kongratula Governu ne’ebé lidera husi Primeiru-Ministru, Taur Matan Ruak, ne’ebé buka halo investimentu ne’ebé kle’an.

“Maun boot Kay Rala Xanana Gusmão, koligasaun AMP ne’ebé kontinua esforsu ne’ebé Governu husi kotuk hahú kedan iha 2007 to’o ohin, buka halo investimentu ne’ebé kle’an, maka’as, ho vizaun, korajen, para harii infraestrutura,”  José Ramos Horta hato’o ida ne’e iha lansamentu rebentamentu pedreira iha Aldeia Mota Ikun, Suku Mota Ulun, Postu Administrativu Bazartete, Munisípiu Liquiça, ne’ebé mak halo husi empreza China Harbour ho objetivu atu aterra tasi iha Portu Tibar, ohin.

Horta dehan, laiha rai iha mundu ne’e, hakarak dezenvolve ekonomia la dezenvolve uluk infraestrutura. Iha Amérika, Austrália, Áfrika, Xina, sira halo nune’e. Hahú ho infraestrutura estrada, ponte, portu no aeroportu.

Aléinde ne’e halo mós formasaun, haruka timoroan bá estuda iha li’ur liuhusi programa Fundu Dezenvolvimentu Kapitál Umanu (FDCH, sigla portugés).

“Importante tebes hakle’an dame, estabilidade, para dezenvolvimentu ne’e bá oin,” afirma Ramos Horta.

Eis Prezidente Repúblika ne’e fó parabéns tanba serimónia lansamentu rebentamentu pedreira ne’e halo parte dezenvolvimentu Portu Tibar tanba atu halo portu ne’e tenke halo duni ida ne’e, fera fatuk ho sistema modernu.

Laureadu Nobel ba Dame nian  ne’e dehan, ida ne’e sistema ne’ebé halo dahuluk iha Timor-Leste para bele kumpre prazu kontratu ne’ebé Governu halo ho Bolloré, kompañia Fransa nian.

Horta hatutan, investimentu ba Portu Tibar ne’e mai husi Timor-Leste, Banku Mundiál, International Finance Corporation (IFC), empreza boot Bolloré ne’ebé atu halo jestaun Portu Tibar nian no kontraktor mak China Harbour.

Notísia relevante : PM Lansa Ona Konstrusaun Projetu PPP Portu Tibar

Jornalista          : Maria Auxiliadora

Editór                 : Francisco Simões

HAKEREK NO HATÁN

Please enter your comment!
Please enter your name here