Diretor Eksekutivo Hospital Nasional Guido valedades, Aniceto Bareto. Imajen Antonio Goncalves

DILI, 12 jullu 2019 (TATOLI) – Ospitál Nasionál Guido Valadares (ONGV) iha fulan-juñu rejista pasiente hamutuk 3.765, hosi númeru ne’e ema 139 mak mate tanba mai ho moras krónika, stroke, raan midar no tensaun aas.

“Ema hirak ne’ebé mate barak liu mai-hosi moras króniku, segundu maka stroke iha kakutak”, dehan Diretór ONGV, Aniceto Cardoso Barreto, ba jornalista sira iha ONGV, ohin.

Moras króniku, Aniceto haktuir moras rins ne’ebé kleur ona, komplikasaun moras la’ós ida de’it maibé rua hanesan; mai ho moras diabetes (raan midar) depois  tensaun aas no akontese stroke.

“Ko’alia kona-ba mate iha kestaun rua. Mate depois oras 48 no mate antes oras 48, depois oras 48 ne’e jestaun internal, tenke hadi’a. Antes oras 48 tenke hadi’a sistema referral hosi li’ur, katak antes to’o mai iha ospitál mate ona, ne’e la’ós kestaun laiha tratamentu adekuadu”, dehan Aniceto.

Juñu, nia afirma ema ne’ebé tama iha sala urjénsia aas tebes, maibé hosi kazu sira ne’e balu mai ho kondisaun labele salva. Númeru 139 ne’e maioria mai ho kondisaun labele salva.

Relasiona ho númeru mortalidade ne’e, Aniceto dehan médiku sira halo ona esforsu hodi fó tratamentu, maibé tanba pasiente sira tama iha ONGV ho kondisaun grave.

Atualmente totál pasiente ne’ebé baixa iha ONGV hamutuk 276, maioria hosi maternidade, medisina interna katak moras infesaun no kanóniku, nune’e mós iha pediatria.

Porsentu 95.9 Pasiente ONGV Mak Hetan Salvasaun Iha 2018 Hosi Total 21.931

Jornalista; Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here