Ministru Negósiu Estranjeiru no Kooperasaun (MNEK), Dionísio Babo Soares

DILI, 12 jullu 2019 (TATOLI) – Estadu Timor-Leste liuhosi embaixada iha Malázia ho konsuladu Bali, halo ona esforsu hodi haruka fila Martalena da Costa mai Dili, depois imigrasaun Indonézia iha Bali deporta ba Malázia.

Billete Martalena hosi Malázia mai Bali.

Martalena sei to’o Bali kalan ne’e ho aviaun Malaysia Airlines, tanba fasilita hosi embaixada TL iha Malázia no billete viajen mai Timor ba aban ho aviaun Citilink, sábadu (13/7), fasilita hosi konsuladu Timor iha Bali.

“Embaixadora, señora Olandina Caeiro Alves, ho staf embaixada halo esforsu hotu, negosia ho imigrasaun Malázia durante loron rua no konsege husik señora Martalena”, esklarese Ministru Negósiu Estranjeiru no Kooperasaun, Dionísio Babo Soares, ba TATOLI via messenger, kalan ne’e.

Martalena da Costa hetan deportasaun hosi imigrasaun Indonézia iha aeroportu Bali, loron 8 foin lalais ne’e bainhira halo viajen hosi Inglaterra atu mai Timor.

“Señora ne’e passaporte mate kle’ur ona, la fila Timor no ba husu dokumentu viajen ba embaixada Timor iha Londres. Ita (embaixada TL iha Londres) fó tiha maibé nia ba hola billete, fila la trata visa ba Indonézia. Imigrasaun Indonézia husu nia hatudu fali kartaun rezidente Inglaterra”, esplika ministru.

Tanba ne’e maka tuir lei imigrasaun Indonézia tenke deporta fila tanba laiha dokumentu, afirma.

Timoroan iha Estranjeiru Tenke Atensaun ba Dokumentu Bainhira Halo Viajen

Jornalista: Rita Almeida
Editór: Rafael Belo

HAKEREK NO HATÁN

Please enter your comment!
Please enter your name here