DILI, 12 jullu 2019 (TATOLI) – Diretór Ezekutivu TradeInvest Timor-Leste, Arcanjo da Silva informa, dezde TradeInvest Timor-Leste estabelese iha tinan 2006, konsege ona atribui sertifikadu investidór 203 no akordu espesiál kuaze 10, maske nune’e sei iha proposta barak mak presiza tetu.

“Proposta lubuk ida tama maibé presiza prosesa, halo, haree dokumentu komprovativu, sira-nia kapasidade finanseira, kapasidade téknika, esperiénsia, sira nia track record ne’ebé investe ona iha rai seluk ka investidór foun mós ita tenke haree hotu, hafoin fó pareser tékniku,” dehan Diretór Arcanjo da Silva iha Palásiu Governu, sesta ne’e.

Nia dehan, mezmu situasaun dinámika iha rai laran maibé vontade investidór sira, tantu nasionál no internasionál boot tebes atu investe iha setór produtivu ne’ebé Governu promove atu diversifika ekonomia, hanesan agrikultura, turizmu no indústria transformadora.

“Mezmu ita-nia governu atravesa difikuldade uitoan maibé motivasaun investidór, tantu nasionál no internasionál, aas tebes atu mai investe iha ita-nia rai, tanba sira hateke ba setór produtivu ne’ebé ita-nia Governu identifika no promove hodi atrai investidór sira atu mai investe,” dehan Diretór Arcanjo

Nia akresenta, durante nia mandatu nu’udar Diretór Ezekutivu TradeInvest Timor-Leste iha tinan 2015  to’o agora atribui ona kuaze 30 sertifikadu investidór.

“Kapitál investimentu ne’ebé mobiliza durante ha´u-nia mandatu to’o ohin loron to’o proposta ne’ebé sira aprezenta no ita aprova no atribui sertifikadu investidór hamutuk billaun $1,2 tuir proposta investimentu no 80% implementadu,” dehan tan diretór ne´e.

Tuir Diretór Arcanjo da Silva, investidór sira haree ba reforsu instituisaun sira atu fó atendimentu di´ak ba investidór sira tantu nasionál no internasionál atu investe Timor-Leste.

Nia informa husi sertifikadu investidór sira ne’ebé atribui ona, 60% investidór internasionál, PPP (Parseria Públiku Privadu (PPP) ) 1% husi totál no barak liu mai husi Austrália no Singapura. “Ita sura sertifikadu investidór no kapitál, ida ne’e la sura se mak halo investimentu ne’ebé barak liu”.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here