Diretór Nasionál Disseminasaun Informasaun (DNDI), Estevão Belo. Foto ist

DILI, 12 jullu 2019 (TATOLI)—Diretór Nasionál Diseminasaun Informasaun (DNDI), Estevão Belo, informa Biblioteka Komunitária ne’ebé sei harii bele fasilita komunidade no estudante sira asesu ba informasaun.

“Biblioteka Komunitária hanesan promove, hasa’e kultura lee  ba komunidade. Informasaun hotu-hotu tau iha ne’ebá, nune’e ita-nia populasaun sira, juventude, estudante sira ne’ebé iha suku ne’e bele asesu informasaun kona-ba progresu dezenvolvimentu,” nia informa ba Agência TATOLI, iha Palásiu Governu, sesta ohin.

Diretór ne’e hatutan, sentru informasaun ne’e hanesan sentru fornesimentu ba asesu informasaun ba populasaun ne’ebé harii hosi xefe suku iha área rurál sira.

Nia hateten katak Biblioteka Komunitária ne’e pakote hosi programa “Naroman Ba Suku”. Programa ne’e sai mós projetu pilotu iha prosesu tuir mai. Nia esplika, komunidade bele asesu jornál no livru sira iha Biblioteka Komunitária refere.

“Povu bele asesu progresu dezenvolvimentu liliu saida mak Oitavu Governu halo ona, saida mak governu sira uluk rai hela no sei finaliza hosi Oitavu Governu,” dehan Diretór Nasionál Diseminasaun Informasaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here