Ekipa konjunta KAK, KFP, ho PDHJ Rejionál Bobonaro observa Postu Serbisu Fronteira Motain no Nunura-Tunubibi, Munisípiu Bobonaro. Imajen/Espesiál

DILI, 11 jullu 2019 (TATOLI)-Ekipa konjunta Komisaun Anti Korrupsaun (CAC-sigla portugés) ba Asuntu Prevensaun no Sensibilizasaun, Espesialista Anti-Korrupsaun (EAK) Komisaun Funsaun Públiku (CFP-sigla portugés) Provedór Direitus Umanu no Justisa (PDHJ-sigla portugés) Rejionál Bobonaru observa Postu Serbisu Fronteira Motain no Nunura-Tunubibi, Munisípiu Bobonaro, hodi identifika katak,  kondisaun no fasilidade mínimu no frajil tebes ba ema livre bele halo tranzasaun ai-moruk droga tama-sai Timor-Leste no Indonézia.

Iha vizita serbisu ne’ebé ekipa konjunta hala’o iha loron rua; sesta-sábadu (05-06/7/2019), nota Alfándega menus rekursu, inklui mínimu fasilidade adekuadu atu fasilita sira halo kontrolu ba sasán sira ne’ebé ema lori tama sai iha fronteira.

Komunidade sira hala’o atividade iha Fronteira Nunura-Maliana. Imajen/Espesiál

Vizita surpreza ne’e mós nu’udar implementasaun Lei No. 8/2009 15 de Jullu sobre kriasaun KAK artigu 5 Komisaun nia kompeténsia, halibur (rekolla) no analiza informasaun hirak ne’ebé kait ho kauza sira no prevensaun korrupsaun. Halo asaun sira kona-ba sensibilizasaun hodi limitasaun lala’ok korrupsaun nian, motiva ema sira atu kuidadu (preokupasaun) ka hamenus (redús) hahalok no situasaun hirak ne’ebé lori (fasilita) ema ba hamosu hahalok kriminozu sira.

Vizita ekipa ne’e atu fó hanoin (akonsella) kualkér instituisaun ka estimativa públika kona-ba oinsá prevene no funu hasoru korrupsaun nian.

“Se ita husik hela kondisaun ne’e akontese hela de’it, la kria kondisaun infraestrutura no mapa pesoál funsionáriu sira atu halo atendimentu ba prosesu tranzasaun iha fronteira ida luan ne’e perigozu tebe-tebes,” hateten Komisáriu KFP ba Asuntu Dixiplinár, António Freitas, ohin, ba Ajénsia  Tatoli iha nia knaar fatin, Edifísiu KFP, Dili.

Nia dehan, durante vizita ekipa observa serbisu funsionáriu Alfándega iha Postu Batugadé no Nunura-Tunubibi, Maliana, grave tebes. Iha Tunubibi funsionáriu Alfándega la iha edifísiu no sira halo kontrolu ba populasaun sira ne’ebé halo movimentu vizita no halo atividade negósiu iha de’it mota ninin no ai-kakeu laran entre baliza fronteira Tunubibi no Hali-Lulik Atambua nian.

 Kondisaun serbisu ne’ebé la nesesária, tuir Komisáriu António, perigozu tebes atu ekipa Alfándega atu prodús serbisu efikásia ho efisiénsia

Bazeia inspesaun ekipa simu mós relatóriu instrusaun ne’ebé hato’o husi Alfándega Batugadé katak, movimentu populasaun sira atu halo atividade negósiu no vizita povu rai rua loro-loron tama sai ho volume númeru ne’ebé boot no dala barak Alfándega labele konsege kobre tanba dala ruma povu balun sei halo atividade negósiu liu husi meius ilegál.

Ekipa konjunta KAK, KFP, PDHJ Rejionál Bobonaro, observa kondisaun Postu Serbisu Fronteira Motain no Mota Nunura-Tunubibi, Munisípiu Bobonaro. Imajen/Espesiál

Entretantu iha vizita loron rua ne’e, ekipa konjunta mós halo kedas enkontru ho ekipa Alfándega, Unidade Polisia Fronteira, no liña ministériu sira ne’ebé serbisu iha Postu Fronteira atu kontinua koopera malu para rekomenda proposta ba governu hadi’a urjénsia kondisaun servisu hotu.

KAK rasik mós preokupa mákina raiu-x ne’ebé monta iha Postu Fronteira Batugadé nian balun aat ona.

“Mákina raiu-x boot ida aat tiha ona, ami deteta buat balun bainhira Kompañia Internasionál ne’ebé manan konkursu kona-ba manutensaun raiu-x ne’e ami haree mosu buat oin seluk, ida ne’e KAK maka sei halo nia knaar atu haree problema ne’e,” Komisáriu Antonio hateten.

Liu husi vizita ne’e, ekipa konjunta sei halo rekomendasaun ba Autoridade Aduaneira (AA/Alfándega) no Ministériu Finansas, oinsá investe osan sosa tan mákina raiu-x no hadi’a fila fali mákina raiu-x boot rua ne’ebé aat iha Postu Batugadé nian.

Vizita ekipa ne’e kompostu husi Komisáriu Adjuntu KAK ba Asuntu Prevensaun no Sensibilizasaun, Luis de Oliveira Sampaio ho Espesialista Anti-Korrupsaun (EAK) na’in tolu, Komisáriu KFP ba Asuntu Dixiplinár, António Freitas, Provedór Direitus Umanu no Justisa (PDHJ) Rejionál Bobonaro.

Jornalista      : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here