Komunidade simu Sekretáriu Estadu Komunikasaun Sosiál, Merício Akara, bainhira sosializa programa “Naroman Ba Suku” iha área rurál. Imajen Mídia SEKOMS

DILI, 12 jullu 2019 (TATOLI)—Diretór Nasionál Diseminasaun Informasaun (DNDI), Estevão Belo, hateten lansamentu ba programa Naroman Ba Suku sei realiza 20 jullu iha Suku Rotutu, Munisípiu Manufahi.

Governu liuhosi Sekretaria Estadu Komunikasaun Sosiál, lideradu Merício Akara, kria polítika ne’e hodi hakbesik programa VIII Governu ba povu, katak ‘Governu iha Povu Nia Leet’ liuhosi aspeitu informasaun no komunikasaun.

“Lansamentu ba programa Naroman ba Suku ne’e iha Suku Rotutu, ne’e nível nasionál nian ne’ebé hanesan pilotu,” nia informa ba Agência TATOLI iha Palásiu Governu, sesta ohin.

Diretór Estevão esplika lansamentu programa Naroman Ba Suku iha Suku Rotutu ne’e reprezenta suku 452 iha territóriu nasionál.

“Objetivu importante ida maka tanba informasaun iha área rurál sira seidauk la’o di’ak, hanesan televizaun, rádiu no jornál foin asesu %40, liliu progresu dezenvolvimentu informasaun seidauk to’o baze, entaun programa Naroman ba Suku tenke iha povu nia leet,” nia katak.

Suku sira ne’ebé sai pilotu ba programa ne’e, nia haktuir, Baucau iha suku ida, Lautém iha Suku Loré II no Suku Muapitine, Aileu iha Suku Liurai ho Same iha Suku Rotutu.

“Programa ne’e atu atinje governu iha povu nia leet hodi esplika programa governu nian liliu dezenvolvimentu saida mak governu atinje ona. Segundu, fó informasaun klaru ba povu kona-ba progresu dezenvolvimentu ne’ebé atinje ona, alokasaun orsamentu, infraestrutura. Terseiru, ekipa sei rekolla fali informasaun iha área rurál ba ministériu relevante, hanesan hadi’a estrada, entaun ami sei halo proposta ba Ministériu Obra Públika hodi tau atensaun,” dehan nia.

Nune’e mós, Belo hatutan, bainhira suku ida la asesu ba eletrisidade, entaun ekipa Naroman ba Suku liuhosi Sekretaria Estadu Komunikasaun Sosiál kanaliza informasaun ba ministériu relevante hodi tau atensaun.

Diretór ne’e haklaken katak orsamentu liuhosi verba ba programa Naroman Ba Suku prevé iha tinan 2019 hamutuk rihun $40.

Nia hato’o katak iha lansamentu ne’e sei partisipa hosi membru governu, reprezentante povu sira, embaixadór balun, organizasaun naun governamentál balun no komunidade iha Munisípiu Manufahi.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here