Jurista timoroan, Fernando Carvalho. Imajen/Domingos Piedade Freitas.

DILI, 11 jullu 2019 (TATOLI) –Atu bele iha garantia ba sasán importasaun ne’ebé  tama mai Timor Leste livre husi kontaminasaun ai-moruk at no droga, importante atu Governu tau fasilidade detetór moderna hanesan raiu-x iha fronteira terrestre Batugadé, Aeroportu Internasionál Prezidente Nicolau Lobato ho Portu Dili.

Jurista timoroan, Fernando Carvalho, fó hanoin mós ba entidade relevante atu prepara mós nia rekursu umanu kualifikadu no sufisiente atu bele  halo analiza ba rezultadu sasán ne’ebé fasilidade detetór raiu-x fó sinál ne’ebé iha relasaun ho ai-moruk at no ai-moruk droga.

“Ha’u hanoin akontesimentu sira, hanesan kazál timoroan lori droga, nu’udar lisaun ida ba ita nia Governu, liuliu iha parte Serbisu Migrasaun ho Alfándega atu oinsá halo antesipasaun ba futuru,” hateten Fernando Carvalho, ohin, ba Ajénsia TATOLI via komunikasaun WhatsApp.

Tuir nia haree, dala balun, ema uza Timor Leste nu’udar fatin transporta objetu, hanesan droga no hatama sasán ilegál tanba ema sira ne’e aproveita Timor Leste nia frakeza, hanesan menus fasilidade no mukit koñesimentu.

Jurista ne’e hateten, presiza mós iha polítika rotasaun no reforma ba ajente Serbisu Migrasaun ho Alfándega  sira iha fronteira, aeroportu no portu, atu asegura serbisu ida di’ak no rigor.

Husi parte seluk, Advogadu privadu Indonézia, Jeremias L.M Haekase husu mós ba estadu Timor Leste presiza  sensibiliza ninia sidadaun liuhusi meius oi-oin, atu la bele sai vítima ba ema seluk nia interese, ne’ebé bele prejudika sira nia vida moris.

Notísia Relevante : http://www.tatoli.tl/2019/06/governu-planeia-hola-raiu-x-foun/ ‎

Jornalista   : Domingos Piedade Freitas

Editór         : Francisco Simões

HAKEREK NO HATÁN

Please enter your comment!
Please enter your name here