Koordenadór AS Ponta Leste, Osorio da Costa Florindo

DILI, 11 jullu 2019 (TATOLI)—Dadaun ne’e, jogu kontinuasaun Liga Futeból Amadora (LFA) époka 2019 besik tama ona ba jornada hitu (7) hodi kompleta jornada primeira volta nune’e bele hakat ba segunda volta.

Bainhira atu hakat ba segunda volta, LFA sei fó oportunidade ba klube sira atu halo transferénsia ba jogadór hotu ne’ebé joga iha klube Primeira Divizaun. Nune’e mós fó oportunidade ba klube sira atu sosa jogadór hosi estranjeiru.

Tanba ne’e, Koordenadór AS Ponta Leste, Osorio da Costa Florindo, hateten sira sei la buka tan jogadór estranjeiru hodi reforsa Ponta Leste iha jogu segunda volta maibé sira sei buka de’it jogadór lokál ida ka rua atu reforsa tan iha liña klaran (médiu).

“Ami tuur hamutuk ona entre estrutura no treinadór atu buka tan jogadór lokál balun atu priénse maibé sei halo negosiasaun hela, liliu buka iha klube Segunda Divizaun sira ne’e tanba barak liu sei joga hela iha Kopa 12 de Novembro nian. Bainhira Kopa ne’e terminadu ona entaun ami haree para foti tan balun hosi ne’ebá,” dehan fundadór Ponta Leste ne’e ba jornalista iha edifísiu Xanana Sport Center, Bairru Formosa, Dili, foin lalais ne’e.

Nia haktuir, jogadór ne’ebé haforsa hela Ponta Leste maioria jogadór ho idade ne’ebé ki’ik hamutuk rua-nulu (20) mai kraik no jogadór idade boot laduun barak tanba tuir prinsípiu Ponta Leste katak jogadór biar idade ki’ik maibé tenke badinas tuir treinamentu ne’ebé treinador fó no disiplina iha jogu nia laran.

“Kona-ba treinu, ami estrutura fó konfiansa tomak ba treinadór atu haree. Ami-nia alvu la’ós atu sai kampiaun maibé naran katak labele tuun ba Segunda Divizaun. Se rezultadu hatudu pozitivu, ami agradese,” dehan Osorio.

“Ha’u fiar katak jogu segunda volta ne’e ekipa hotu-hotu sei prepara di’ak liu-tan, katak kompetisaun ne’e sei la’o maka’as. Ami-nia jogadór bele dehan la’ós joga ladi’ak maibé jogadór mak foun de’it entaun presiza treinu atu manán esperiénsia,” nia hateten.

Entretantu, sistema kontratu jogadór Ponta Leste la termina iha jogu segunda volta maibé semana ba semana. Kuandu prestasaun ladi’ak, klube foti desizaun hapara imediata. Hosi jogu dahuluk to’o agora, jestoriál AS Ponta Leste hapara ona jogadór hamutuk rua (2) nia kontratu tanba la hatudu prestasaun di’ak bainhira joga.

Bainhira Agência Tatoli tenta husu naran jogadór rua (2) ne’ebé Ponta Leste hapara, maibé fundadór klube ne’e lakohi mensiona naran (sijilu).

Jornalista: Hortençio Sanchez

Editór: Xisto Freitas

Relasiona : Ekipa Juvenil AS Ponta Leste Preparadu Ona

 

HAKEREK NO HATÁN

Please enter your comment!
Please enter your name here