João Bosco Baptista Colo Batan, estudante timoroan husi Oe-Cusse ne'ebé ema lori lakon iha Jogjakarta, Indonézia, to'o oras ne'e seidauk hetan. Imajen/Espesiál

DILI, 11 jullu, 2019 (TATOLI)– Polisia Repúblika Indonézia (POLRI) kontinua halo persegisaun no buka tuir autór Timoroan na’in tolu (3) ne’ebé deskonfia lori subar  João Bosco Baptista Colo Batan  iha Jogjakarta, Indonézia.

Prokurasaun ne’ebé Constansio Suni, nu’udar Bosco nia aman ba Advogadu João Meco.

João Bosco Batista Colo Batan, ho naran bolu Bosco husi Aldeia Masin, Suku Costa, Sub-rejiaun Pante Makasar, Rejiaun Administrativa Espesiál Oe-Cusse Ambeno (RAEOA), lakon iha Jogjakarta iha loron 02 jullu liu ba no too oras ne’e seidauk hetan.

João Meco, nu’udar advogadu ne’ebé hetan   husi vítima Bosco nia aman Constansio Suni, informa, nia kontinua halo komunikasaun ho autoridade Polisia Indonézia hodi buka tuir Bosco to’o hetan.

Bosco hela iha Jogjakarta iha rua Maguwo 0, Banguntapan, Bantul, Rumah 161, RT 24. Nia eskola iha Sekolah Tinggi Teknik Adisucipto (STTA) Jogyakarta, Departemen Tenkik Industri Penerbangan, Semestre 2 , no tuir planu iha loron 17 fulan ne’e, Bosco sei hala’o ezame semestre (TAS).

Informasaun ne’ebé jurista João Meco simu husi autoridade Polisia Jogjakarta katak, iha indísiu forte Bosco lori lakon husi ema na’in tolu (timoroan hotu) ne’ebé kalan ne’ebá ba  tula sai Bosco.

“Polisia deskonfia forte katak, ema na’in tolu ne’ebé ba tula Bosco ne’e mak autór lori lakon Bosco,” informa João Meco, ohin, ba Ajénsia TATOLI via komunikasaun WhatsApp.

“Ha’u husu ba ema hotu ne’ebé iha relasaun família ou kolega ho autór na’in tolu ne’ebé ba  tula sai Bosco atu tatoli hela ba sira para liberta Bosco,” hateten João Meco.

João Meco informa, autoridade Polisia mós kontinua buka tuir autór na’in tolu ne’e, maibé to’o agora seidauk hetan sira nia ain-fatin, inklui polisia halo ona kontaktu ba sira na’in tolu nia númeru telefone mós la ativu ona.

Husi sorin seluk, Constansio Suni informa via telefone ba TATOLI katak, nia nu’udar aman ba Bosco simu informasaun husi sasin Daniel Ola (Bosco nia tiun) ne’ebé eskola mós iha Jogjakarta Indonézia, katak, Bosco seidauk hetan to’o agora.

Daniel Ola hela hamutuk ho Bosco iha uma (kontrakan) ida ne’e kont tuir ba Bosco nia papa katak, iha dia 02 jullu 2019,   tuku 11:00-kalan, bainhira Daniel ho Bosco, ho tan kolega na’in rua; Agio Tolan ho João, sei hadeer hela hodi hemu kafé. Derrepente, iha timoroan na’in tolu tama ba uma ne’ebé sira hela ba, ho brutal no mosu kedan haksesuk malu entre sira.

Tuir sasin, timoroan na’in tolu (autór) ne’ebé tula lakon Bosco  nu’udar mós estudante Timoroan ne’ebé eskola iha Jogjakarta, Indonézia.  Entre sira na’in tolu nee, na’in rua Bosco nia kolega rasik ne’ebé eskola hamutuk iha universidade ida.

Sasin Daniel Ola haktuir ba Constansio Suni katak, iha momentu ne’ebá, autór sira tama ho motor rua, no karreta ida para dook uitoan husi uma kontrakan.

Autor sira tama ba halo barullu no akontese haksesuk malu ho Bosco. Maibé, Bosco la bele book an tanba nia moras ain bubu hela.

Bosco nia kolega sira ne’ebé hela hamutuk pániku no ta’uk tanba dezentendimentu. Nune’e, sira balun halai haksoit liu moru para salva an, ida seluk halai ba subar iha hariis fatin no Daniel Ola hanesan Bosco nia tiun ba subar tiha iha dapur laran.

“Bosco tuur hela no labele book an tanba nia ain bubu hela ho kondisaun moras labele hamriik, maka ema na’in tolu (autór) sira ko’us Bosco no tula ba motor, no lori ba tula tan iha karreta ne’ebé para dook husi uma ne’e,” Constansio Suni haktuir Daniel Ola nia komunikasaun.

Liutiha loron ida, Daniel Ola hein no hein Bosco la fila, entaun nia informa ba polisia no polisia foti gravasaun CCTV husi loja boot ida iha Bosco nia uma kontarakanoin.

Husi gravasaun ne’e parte polisia Jogjakarta identifika no hatudu faktu balun katak, iha ema na’in tolu mak ko’us  Bosco sai husi uma, tula ho motor no lori ba tula tan iha karreta ne’ebé para dook uitoan husi uma kontrakan.

Constansio Suni hateten, família seidauk halo buat ida tanba ho kestaun distánsia Oe-Cusse ho Jogjakarta ne’ebé dook, maibé Bosco ninia tiun ida husi Oe-Cusse too ona Jogjakarta iha Sesta (05/07/2019) hodi akompaña besik liu prosesu investigasaun.

“Bainhira autór sira halai mai Timor, husu mós governu Timor Leste, liuliu Polisia Nasionál Timor Leste (PNTL) atu matan moris hodi buka tuir mós tanba autór na’in tolu ne’e mesak timoroan hotu,” hateten Constansio Suni.

Bainhira Jornalista konfirma ho Komandante Jerál Polisia Nasionál Timor Leste (PNTL), Komisáriu Faustino da Costa, maibé komandante hateten, parte seguransa seidauk bele  fó komentáriu ba asuntu ne’e.

Jornalista        : Cipriano Colo

Editór              : Francisco Simões

HAKEREK NO HATÁN

Please enter your comment!
Please enter your name here