Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 11 jullu 2019 ( TATOLI)- Parlamentu Nasionál (PN) hahú halo konvokatóriu liuhusi enkontru lider bankada hodi haree ajenda diskusaun ba lei haat hanesan alterasaun ba lei tributária, lei atividade petrolífera, lei fundu petrolíferu no lei rua seluk nú. 3/2003 no lei nú.4/2003, ne´ebé mak governu submete ona ba PN iha loron 9 jullu 2019.

Prezidente PN, Arão Noe de Jesus hateten, PN halo reuniaun konvokatóriu hodi haree ajenda diskusaun ba lei haat  ne´ebé mak governu submete ona ba PN inklui ratifikasaun tratadu fronteira marítima.

“Ohin lider bankada sira konkordánsia ona para orsida loraik três horas lorokraik iha plenária extraordinária para baixa tiha lei haat ne´e ho tratadu ne´e ba komisaun sira kompetente,” dehan Prezidente PN, Arão Noe ba jornalista sira bainhira ramata enkontru lider bankada iha PN, kinta ( 11/07/2019).

Nia  haktuir, liuhusi  enkontru lider bankada ne´e  identifika komisaun tolu hanesan Komisaun B (Asuntu defeza no seguransa), Komisaun C (Asuntu finansa públika) ho Komisaun D (Asuntu ekonomia no dezenvolvimentu) hodi haree proposta lei sira ne’e.

“Orsida  baixa tiha sira ne’e ba sira i halo ssira relatóriu pareser to´o segunda feira i tersa maka hahú plenária para apresiasaun  ba relatóriu pareser  husi komisaun sira iha ona jeneralidade,” tenik Arão.

Lider másimu órgaun lejizlativu ne´e esplika, depois ne´e plenária aprova iha jeneralidade depois plenária maka delibera para matéria sira ne’e baixa fali ba komisaun hodi halo diskusaun iha espesialidade.

“Haree husi asuntu ne´e,  ohin opinaun lider bankada sira matéria ne´e como barak liu tanba lei haat inklui ratifikasaun tratadu entaun di´ak komisaun ida halo diskusaun espesialidade depois finál globál maka mai plenária. Mas ida nee asuntu ida ne´ebé ke plenária maka haree orsida plenária maka sei deside”.

Prezidente PN, Arão Noe de Jesus konsidera proposta lei haat ne´ebé governu  submete ba PN ne´e ho karakter urjénsia ne´e loos tanba tuir justifikasaun husi governu  ratifikasaun  ba fronteira marítima entre estadu rua; Timor- Leste no Austrália, tenke  30 agustu.

“Ita haree ba argumentu ne´ebé iha justifikasaun katak iha duni no foó duni timing Ida katak atu troka nota entre estadu rua; Timor- Leste ho Austrália  iha dia 30 de Agustu atu tratadu ne´e tama vigór. Entaun atu atinji prosesu ne´e ba, ita tenke haree no prosesu sira ne’e tenke aselera atu nune´e hodi kumpri akordu konkordánsia ne´ebé que entre estadu rua halo,” dehan  Prezidente PN, Arão Noe.

Notísia relevante: http://www.tatoli.tl/2019/07/governu-submete-ona-proposta-lei-haat-ba-parlamentu-nasional/

Jornalista        : Natalino Costa

Editór              : Rafy Belo

HAKEREK NO HATÁN

Please enter your comment!
Please enter your name here