DILI, 11 jullu 2019 (TATOLI)—Óliu fakar iha Portu Dili hafo’er tasi, ohin dadeer. Seidauk hatene loloos sé maka fakar óliu ne’e ba tasi.

Iha fatin akontesementu ne’e, ró New Glory maka atraka hela iha Portu Dili maibé tripulante hosi ró refere la haree sé maka fakar óliu.

Tripulante ró kargo New Glory, enjiñeiru Kusnan hosi Indonézia hakfodak kuandu teki-teki Autoridade Portuária Timor-Leste (APORTIL) husu sira nia reponsalblidade tanba óliu nakfakar iha tasi mai hosi enjing ró New Glory.

“Ami-nia pozisaun atu sai ona hosi Portu Dili hodi lori fali kontentór mamuk sira ne’e ba Surabaya, Indonézia, derepente de’it ami simu informasun katak óliu nakfakar besik ami nia ró. Ha’u  hakfodak tebes,” Kusnan haktuir ba Agência Tatoli iha Portu Dili, ohin.

Hafoin ne’e, nia dehan, ninia parte hamutuk ho Autoridade Portu Dili halo kedas cheking (pasarevista) ba mákina ró ne’e atu identifika loloos iha problema, maibé realidade mákina ró nian laiha problema—buat hotu la’o di’ak loos.

Tripulante ne’e hatutan depois kuandu laiha sinál ida hosi enzing, entaun sira buka atu identifika hosi li’ur katak óliu ne’e mai hosi ne’ebé maibé la deteta. “Ami halo survey ho bero hale’u tiha tasi Portu Dili nian maibé laiha sinál ida hatudu óliu sira ne’e mai hosi ne’ebé tanba laloran tasi hakmatek loos,” Kusnan informa.

Nu’udar tripulante ne’ebé hatene lei marítima, nia esplika, kuandu ró ida mak hamosu problema hanesan ne’e, sei kona multa ida maka’as, satan ro ida mak tama iha ema seluk ninia nasaun fakar tan óliu hanesan ne’e, ninia multa todan liu-tan.

Maibé, nia hatutan, tanba la deteta óliu ne’ebé nakfakar, entaun Autoridade Portu Dili husu de’it tripulante sira-nia disponibilidade atu hamoos tiha óliu sira iha tasi laran depois mak foin bele hala’o viajen.

Hafoin ne’e, Kusnan organiza ninia maluk tripulante sira hodi hamoos óliu iha tasi no hamoos dezde dadeer to’o ohin loron. “Ami fahe grupu rua iha tasi laran no mós iha pontikais leten. Sira ne’ebé uza bero, utiliza rinso fakar ba tasi ne’ebé nakonu ho óliu para labele alastra tan ba fatin seluk. Esperiénsia ne’e, ami hetan momentu ami tuir formasaun marítima nian,” nia haklaken.

Entretantu, Wasel Operation, Alcino Pires hosi Ajénsia Ariana ne’ebé responsabiliza ba ró kargo New Glory afirma katak hafoin nia trata tiha cleaner shut entrega tiha ba kapitaun ró New Glory nian mak informasaun tama katak óliu nakfakar iha besik ró New Glory atraka ba ne’e.

Tanba ne’e, nia tenta halo cheking ba ró ne’e maibé laiha sinál ida mak hatudu óliu sai hosi ró refere. Entaun, laiha razaun ida atu husu responbilidade ba sira tanba buat hotu bazeia ba faktu. Ne’e duni, Autoridade APORTIL husu de’it responsablidade ba tripulante sira atu hamoos de’it depois mak sira bele sai.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here