DILI, 11 jullu 2019 (TATOLI) – Ministériu Saúde (MS) sei hasoru obstákulu bainhira prepara menu ba programa merenda eskolár iha eskola sira.

“Menu ne’ebé propoin ba kada eskola, dala-ruma iha munisipiu ne’e ai-han sira ne’e la eziste, tanba difisil ba ami atu deside menu, maibé agora daudaun ami sosializa hela manuál ida para oinsá atu halo dietétika ba ai-han kada ema, kada idade”, hateten Diretór Nasionál Saúde Públika, Pedro Canisio, iha Timór Plaza, ohin.

Nia informa hahú 2002 to’o mai agora, MS hamutuk ho Ministériu Edukasaun asina akordu atu haree programa saúde iha edukasaun ne’ebé tama mós iha kurríkulu ida bolu naran saúde eskolár.

Akordu ne’e, papél MS nian mak akompaña no superviziona, monitorizasaun ijiene no mós prepara ai-han ba merenda eskola iha eskola hotu.

“Kada labarik ida tenke hetan kilo kaloria hira, karboidratu, no mineral hira, tan ha’u hakarak dehan ami prepara menu ne’e hotu ona no fó formasaun ba professor hotu”, afirma.

Nia hatutan tan: “Ami mós ko’alia ona ho ekipa ida ne’ebé fó formasaun ba ekipa ne’ebé nomea hosi eskola sira hodi te’in ba labarik sira, formasaun ne’e la’ós kona ba hahán de’it maibé mós kona ba preparasaun ba ai-han mós ami fó”.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here