Ministru Obras Públikas Salvador Soares dos Reis Pires, Imajen/Egas Cristovão

DILI, 11 jullu 2019 (TATOLI)—Atu realiza programa revitalizasaun no abitasaun komunitária, Ministériu Obra Públika (MOP) involve autoridade  munisípiu liliu Prezidente Autoridade Munisipál Dili hodi bele liberta rai ne’ebé atu harii bairru foun.

Planu Oitavu Governu Konstitusionál fó prioridade atu estabelese uma hamutuk 2.000 to’o 4.000 atu revitalisa bairru hodi regula futuru abitasaun komunitáriu iha kapitál Dili.

Ministru Obra Públika (MOP), Salvador Eugénio Soares dos Reis Pires, tenik Gabinete Ministériu Obra Públika (MOP) ho Diresaun Jerál Abitasaun no Planu Urbanu (DGHPU) hahú  diskute ho Prezidente Autoridade Munisipál Dili, Gaspar Soares, hodi ko’alia kona-ba involvimentu munisípiu nian iha prosesu libertasaun parsela rai Hera no Kulau.

Parsela rai ne’e, Ministru Salvadór dehan,  tékniku MOP hamutuk ho parte Ministériu Justisa (MJ) no autoridade lokál sira identifika ona iha área tolu mak hanesan iha parte Comoro, Kulau no Hera atu sai fatin ba abitasaun komunitária.

“Ita serbisu hamutuk ho Ministériu Justisa atu fó rai iha  Becora no Comoro ho ektare 6.4  no Hera  ho ektare 25 resin ho alvu mak halo uma 2000 to’o 4000,” katak ministru ne’e, ohin, iha edifísiu Ministériu Finansa, Aitarak-Laran, Dili.

Molok ne’e, Salvador esklarese, estudu pre-viabilidade finaliza ona ne’ebé  atu kontinua ba faze estudu viabilidade atu haree no estudu kona-ba impaktu sósiu-ekonómiku área alvu ne’ebé hela iha bairru kobre sira ne’e atu muda ba abitasaun foun.

Ba implementasaun, ministru haklaken, sei uza sistema projetu Parseria Públika Privada (PPP) ne’ebé enkoraza ba setór privadu atu investe.

Programa Oitavu Governu Konstitusionál fó prioridade ba revitalizasaun no abitasaun komunitáriu tanba ho vizaun revitalisa atu asegura povu asesu ba rai, uma ne’ebé mak dignu no asesu ba infraestrutura báziku sira hanesan bee-moos, eletrisidade no saneamentu.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here