Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos.

DILI, 10 jullu 2019 (TATOLI)—Vise Prezidente Komisaun A trata Asuntu Konstitusionál no Justisa, Francisco de Vasconcelos hateten Ezbosu Lei Antí Korrupsaun (LAK) ne’ebé ho nia artigu hamutuk 140 itál ne’e, Komisaun A foin mak konklui artigu hamutuk 22 hosi kapítulu ida nian no sei falta kapítulu 6 mak seidauk book.

Tuir nia katak presiza halo diskuasaun ida kle’an no tenke haree didi’ak artigu sira ne’e para ba futuru labele hamosu persepsaun katak Tribunál sira fó kastigu ba ema arbiru de’it.

“Fiar katak tinan ida ne’e bele besik ramata iha diskusaun. Ami hein de’it posibilidade komisaun nian. Outubru tinan ne’e parese diskusaun tenki paradu fila fali tanba tenki konsentra ba diskusaun orsamentu jerál Estadu (OJE) 2020 nian,” tenik nia ba jornalista iha Parlamentu Nasionál, kuarta (10/7).

Dadaun ne’e, Vasconcelos haktuir, komisaun suspende hela prosesu diskuasaun Ezbosu Lei Antí Korrupsaun ne’e tanba deputadu barak sei hala’o hela estudu komparativu iha rai li’ur. Entaun, Komisaun aproveita tempu ne’e hodi kompleta tan matéria balun para bele fortifika liu-tan diskusaun ne’ebé sei kontinua fali iha setembru tinan ne’e.

 Nia esplika, kriasaun Lei Antí Korrupsaun (LAK) ho objetivu hakarak kombate korupsuan iha nasaun ne’e entaun presiza lei ida forti hodi fó kastigu todan ba sé de’it mak komete aktu korrupsaun.

“Ida ne’e mak ami iha Komisaun A hamutuk ho maluk deputadu sira balun hosi komisaun seluk hala’o hela diskusaun. Maibé, ami mós presiza rona hanoin balun hosi instituisaun estadu sira hanesan Komisaun Antí Korrupsaun (KAK), Ministériu Públiku no Polícia Científica de Investigação Criminal (PCIC) tanba sira mak sei implementa lei ne’e,” nia haklaken.

Tanba ne’e, tuir nia, Lei Antí Korrupsaun ne’ebé diskute dadaun ne’e ho intensaun katak lei ne’e tenki todan. Tan ne’e, prosesu diskusaun ne’e presiza tinan ida atu konklui.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here