Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, 11 jullu 2019 (TATOLI)—Ministra Edukasaun, Juventude no Desportu (MEJD), Dulce de Jesus Soares, hateten formasaun ba profesór sira iha nível hotu-hotu sei kontinua eziste atu hasa’e sira-nia kualifikasaun iha língua portugés.

“Kontinua fó formasaun ba profesór sira ne’ebé mak eziste tanba sira ho idade produtivu tebes. Ne’e duni mak muda polítika ministériu nian invéz halo kursu komplementár maibé ita halo formasaun akadémika ida liuhosi serbisu hamutuk entre INFORDEPE ho UNTL,” dehan nia iha Timor Plaza, Dili, kinta ohin.

Dulce informa, ministériu mós sei rekruta profesór hamutuk 300 resin iha 2019 hodi priénxe vaga sira atu substitui profesór sira ne’ebé mate ona no mós sira ne’ebé reforma ona.

Ministra ne’e haktuir, formasaun ne’ebé INFORDEPE ho UNTL hala’o ne’e semana-ida loron-rua durante tinan-tolu nia laran ba profesór sira ne’e hotu iha grau baxarelatu.

“Tanba tuir lei rejime karreira dosente katak, atu sai profesór, mínimu tenke iha grau akadémiku baxarelatu. Entaun, agora dadaun, esforsu ita halo ho UNTL para hetan kualifikasaun akadémika ne’ebé mak di’ak,” nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here