Reprezentante OMS iha Timor-Leste, Rajesh Pandav. Imajen mídia PN

DILI, 10 jullu 2019 (TATOLI) – Timor-Leste halo ona progresu hodi kombate epidemia tabaku, maibé tuir reprezentante Organizasaun Mundial Saúde (OMS), Rajesh Pandav, Nasaun ne’e presiza ativu liután implementa lejizlasaun anti tabaku.

Lei ne’ebé pasa iha 2016 haktuir bandu fa’an tabaku ba labarik ho idade menus hosi 16 no proibe publisidade no promosaun ba tabaku, bandu fuma iha fatin públiku, reuniaun públiku, servisu fatin, no transporte públika hanesan taxi no mikrolete.

Ministériu Saúde, nia dehan ho lejizlasaun ne’e fó apoiu iha diagnóstiku, konsellu hodi hapara fuma no halo tratamentu ba dependénsia iha tabaku, nu’udar komponente importante kontrola tabaku, hanesan parte ida hosi kuidadu saúde primária.

Nia akresenta fuma ameasa ba saúde públika ne’ebé maka mundu enfrenta, tanba tuir dadus hosi OMS, tabaku hamate ona ema ida kada segundu haat.

Hosi totál ema mate kada tinan milliaun 56.9, milliaun ualu mak mate tanba kauza hotu-hotu. Ema mate milliaun ida tanba fuma pasivu.

Pandav realsa se laiha medida forte hodi kontrola, tuir estimasaun sei aumenta liuhusi ema milliaun ualu  tinan-tinan iha tinan 2030.

“Uzu tabaku hamate ema liu husi milliaun hitu tinan-tinan no kustu ba uma kain no governu liu husi biliaun $1.4 liu husi despeza iha saúde no lakon iha produtividade”, haktuir bainhira halo intervensaun iha formasaun orientasaun ba profisionál saúde sira kona-ba hapara tabaku iha salaun JL Villa, Fatuhada, ohin.

Hatutan: “Uzu tabaku ne’e mak fatór risku prinsipál haat husi epidemia globál ba moras la hada’et, liu-liu kankru, moras kardiovaskulár (fuan), pulmaun, no diabetes. Tabaku mós kontribui ba mate tanba moras la hada’et hotu  besik %16”.

Reprezentante másimu WHO iha Timór-Leste ne’e hatutan tan tinan 2012, moras hirak ne’e hamate ema besik milliaun 16, mate hirak ne’e kuaze porsentu 80 iha nasaun ho rendimentu ki’ik no médiu.

La’ós de’it hamosu moras, maibé Rajesh argumenta tabaku fó ameasa ba dezenvolvimentu Nasaun, tanba tabaku halo fraku sidadaun ne’ebé fuma, no mós halo fraku sosiedade iha vida sosiál ekonómiku.

Kestaun iha sosiál ekonómiku, nia esplika rekursu uma laran ne’ebé limitadu, maibé ema ne’ebé depende obrigadu sosa tabaku duke sosa ai-han.

Fuma tabaku, Pandav afirma kontribui mós ba poluisaun ár iha uma laran, ne’ebé maka ameasa boot liu ba saúde bebé, labarik, adolexente, no adultu sira mós kona fuma pasiva ne’ebé maka iha probabilidade ba kreximentu no funsaun pulmaun la di’ak.

Nia haklaken: “Ema timoroan sira mak entre fumadór aas liu iha mundu %71 ba mane no feto hamutuk %29. Ema adultu na’in sia husi 10 mak kona fuma pasivu iha uma”.

Moras la hada’et mak kauza prinsipál ba mortalidade husi kauza 10. Timor-Leste mós entre nasaun ho todan boot iha moras tuberkuloze.

Rajesh haktuir peskiza Global kona-ba tabaku iha foin sa’e sira tinan 2013 (sigla Ingles:The Global Youth Tobacco Survey (2013) hatudu prevalénsia uzu tabaku boot tebes %42 entre adolexente ho idade 13 to’o 15.

Estudante na’in rua husi tolu mak sofre fuma pasivu iha uma. Labarik besik %70 idade 13 to’o 15 mak sofre tabaku suar husi fatin públiku.

“Iha Timór-Leste idade médiu hahú fuma loron-loron maka 16.4, ida ne’e aumenta risku ba moras iha foin sa’e sira. Peskiza Saúde Globál ba Estudante bazeia ba eskola (2015) hatudu estudante %27.6; %39.6 ba mane no ba feto hamutuk %15.6 idade 13 to’o 17 iha klase 7 to’o 11 mak relata uza produtu tabaku. Kuaze metade husi estudante %45.2 mak fuma antes kompleta tinan 14”, katak nia.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here