Ministru Negósiu Estranjeiru no Kooperasaun, Dionísio Babo Soares ho komitiva pose hamutuk ho nia omologu, Vivian Balkrishan. Foto: MNEK

DILI, 09 jullu 2019 (TATOLI)-Governu Singapura hato´o prontidaun hodi apoiu dezenvolve Timor-Leste nia ekonomia hodi nune´e bele sai membru ba Organizasaun Sudeste Aziátiku (ASEAN-sigla inglés).

Prontidaun ne´e hatoo liuhusi enkontru bilaterál entre Ministru Negósiu Estranjeiru no Kooperasaun Timor-Leste, Dionísio Babo Soares bainhira hasoru malu ho nia omologu Ministru Negósiu Estranjeiru Singapura, Vivian Balkrishan.

Durante enkontru bilaterál ne´ebé maka halao iha eskritóriu Ministériu Negósiu Estranjeiru Singapura nian, tuir komunikadu ne´ebé Ajénsia TATOLI asesu iha tersa (09/7) katak, lider rua ne´ebé tutela ba iha área exteriór ne´e ko´alia liu ba iha asuntu kooperasaun bilaterál ne´ebé maka nasaun rua ne´e estabelese ona, liliu iha área dezenvolvimentu kapitál umanu.

Alende ida ne´e, lider rai rua ne´e mós aborda kestaun balun iha área potensiál sira seluk hanesan saúde, negósiu no ekonomia, ba koopersaun iha futuru.

Iha komunikadu ne´e mós sita, asuntu ASEAN mós sai hanesan tópiku importante durante enkontru bilaterál entre governante rua ne´e.

Ministru Dionísio ho nian omologo Vivian anunsiu katak governu Singapura apoiu misaun avaliasaun ne´ebé sei ba Timor-Leste iha setembru tinan ida ne´e. Objetivu husi misaun avaliasaun ne´ebé sei halo iha Timor-Leste iha setembru tinan ida ne´e maka atu avalia validade aspetu polítika no seguransa Timor-Leste nian.

No rezultadu husi avaliasaun ne´e maka sei sai referénsia ba lider másimu membru ASEAN sira hodi pronunsia desizaun ruma ba Timor-Leste nian adezaun ba ASEAN.

Iha parte seluk, Dionísio Babo Soares apresia inisiativa misaun ne´e, no Timor-Leste atu kolabora ho ekipa avaliadór sira hodi fornese dadus no informasaun adekuada husi kada liña ministeriál no halo esforsu másimu atu priense rekizitu mínimu hodi sai membru ba família ASEAN.

Antes ne´e, iha segunda (08/7), Ministru Dionísio Babo Soares hato´o hela nia liafuan makloke iha fórum negósiu Singapura-Timor-Leste ne´ebé organiza husi Trade Invste Timor-Leste no komunidade negósiu Singapura.

Fórum ne´e partisipa husi emprezáriu no empezaria sira husi Singapura no Timor-Leste nian.

Jornalista      : Natalino da Costa

Editór             : Rafy Belo

HAKEREK NO HATÁN

Please enter your comment!
Please enter your name here