DILI, 10 jullu 2019 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, konvida deputadu sira atu prepara-án hodi konsentra iha debate pokote lei haat kona-ba Alterasaun Lei Fundu Petrolíferu atu loke dalan ba ratifikasaun tratadu Fronteira Marítima iha 30 agustu tinan ne’e.
“Se ita hotu sente katak asuntu ne’e interese nasionál, entaun ha’u husu ita hotu soe tiha interese polítika partidária. Mai ita hotu hamutuk hodi halo ratifikasaun ba tratadu Fronteira Marítima ne’e,” nia dehan ba jornalista iha Parlamentu Nasionál, ohin.
Nia informa, líder bankada sira mak sei foti desizaun iha reuniaun ne’ebé sei hala’o iha kinta (11/07) lorokraik atu tau iha konsiderasaun ba asuntu ne’e tanba atividade petrolífera iha tasi Timor-Leste nian %100 bele sai rikusoin Timor se ratifika ona tratadu Fronteira Marítima.
Arão hatutan hosi lei haat ne’e rasik kuaze iha artigu hamutuk 50 itál mak presiza diskute atu hetan alterasaun, tanba ne’e presizamente deputadu sira-nia partisipasaun ida másimu nune’e bele halo debate ho rigór.
Jornalista: Tomé Amado
Editór: Xisto Freitas
Lee mós notísia ida ne’e: http://www.tatoli.tl/2019/07/governu-submete-ona-proposta-lei-haat-ba-parlamentu-nasional/
