Ministru Obras Públikas Salvador Soares dos Reis Pires, Imajen/Egas Cristovão

DILI, 10 jullu 2019 (TATOLI)—Atu garante kualidade projetu iha Timor-Leste, Ministériu Obra Públika (MOP) hahú estabelese ona ekipa brigada tolu hodi haree no kontrola projetu estadu nian ne’ebé implementa liuhosi orsamentu estadu no impréstimu sira.

“Agora ita reforma ona Unidade Jestaun Projetu hodi estabelese tan ekipa brigada tolu mak ekipa Brigada Leste, Sentru no Oeste. Ekipa ne’e atu haree projetu hotu ne’ebé halo ho orsamentu estadu no impréstimu sira,” tenik Ministru Obra Públika (MOP), Salvador Eugénio Soares dos Reis Pires, ohin iha Palásiu Governu, Dili.

Governante ne’e dehan Ekipa Brigada iha leste sei halo kontrola ba projetu hotu ne’ebé implementa iha área Munisípiu Lautém, Baucau no Viqueque. Ekipa Brigada Sentru kontrola projetu sira iha Munisípiu Manatuto, Dili, Aileu no Liquiçá. Brigada Oeste toma konta ba Munisípiu Bobonaro, Ainaro, Covalima, Manufahi no Ermera.

Dadaun ne’e, Ministru Salvadór dehan ekipa brigada hirak ne’e iha hela munisípiu sira hodi koopera ho kompañia kontratór sira atu garante no asegura kualidade projetu no tuir tempu ne’ebé iha territóriu Timor-Leste.

“Tékniku infraestrutura Gabinete Ministériu Obra Públika (MOP) presiza iha padraun no Sistema Prosedura Operasionál (SPO) atu halo supervizaun ba konstrusaun estrada iha Timor laran tomak ho rigorozu hodi garante kualidade projetu sira,” katak governante ne’e.

Atu mellora serbisu supervizaun, Ministru Obra Públika orienta tékniku infraestrutura Gabinete MOP prodúz SPO ba serbisu supervizaun projetu ho objetivu atu vinkula autoridade supervizaun sira atu la’o tuir padraun espesifikasaun ne’ebé estabelesidu iha kontratu.

Polítika estabelese Ekipa Brigada ne’e, nia dehan, tanba MOP planu realiza projetu 139 iha 2019 nian, MOP sei realiza projetu foun estrada rurál hamutuk 99 ho distánsia kilómetru 700 resin no projetu manutensaun estrada hamutuk 40 resin ho distánsia kilómentu 500 resin iha territóriu Timor laran tomak.

Orsamentu ba projetu hirak ne’e iha liña ministerial hamutuk milliaun $16 resin para realiza projetu sira ne’e, inklui ba ponte sira.

Jornalista: Florencio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here