DILI, 10 jullu 2019 (TATOLI)-Ministru Justisa, Manuel Cárceres da Costa, husu ba autoridade munisipál evita asina dokumentu sidadania ba Timoroan ne’ebé oras ne’e ho nasionalidade Indonézia.
Lei nasionalidade nú.9/2002, la permite atu aprova Timoroan ne’ebé ho nasionalidade Indonézia ne’ebé hakarak fila mai Timor tenke prienxe rekizitu hanesan deklara husik ona sidadania Indonézia, hela iha Timor durante tinan lima no pasa iha ezame nasionalidade.
“Kait ba lei nasionalidade bainhira nia fila mai timor se nia sidadaun Indonézia tenke entrega ninia dokumentu katak husik hela ninia nasionalidade Indonézia depois liu tiha tinan lima nia bele re-arkiri hikas fali hodi hetan hikas fali ninia sidadania Timoroan,” esplika Ministru Manuel Cárceres da Costa, bainhira divulga informasaun kona-ba Lei nasionalidade, lei rejime espesiál ba definisaun titularidade beins imovel no espropriasaun utilidade públika ba autoridade Munisipiu Bobonaro iha Maliana, tersa (09/07/2019).
Nia mensiona hodi bolu atensaun ba autoridade Munisipál no lokál sira tenke evita atu fó nasionalidade ba sidadaun estranjeiru bainhira seidauk prienxe rekizitu ne’ebé implementa tanba ministériu Justisa sei la aprova sira ninia sidadania bainhira identifika.
“Evita nia mai fulan tolu hetan tiha nasionalidade depois nia fila hikas ba Indonézia hetan tan nasionalidade iha ne’ebá, nia kaer dupla sidadania hodi hetan hikas rikusoin ne’ebé husik hela,” afirma Ministru Manuel Cárceres.
Iha lei nú.8/2017 kona-ba espropriasaun ba utilidade públiku no lei nú.13/2017 kona-ba rejime espesiál ba definisaun titularidade beins imovel la autoriza ba sidadaun estranjeiru atu reklama beins imovel ne’ebé husik hela iha Timor Leste bainhira akontese referendum 1999 no Kolonializasaun Portugués.
Tuir definisaun lei rua ne’e hatete, beins imovel estadu Portugés ne’ebé husik hela to’o loron 7 Dezembru 1975 no estadu Indonézia husik hela to’o 9 Outubru 1999 automatikamente tama ona iha propriedade Estadu Timor Leste.
Alende ne’e, Estadu maka sei administra rikusoin Timoroan ne’ebé oras ne’e sei hela Indonézia no sai sidadaun Indonézia.
Jornalista : Agapito dos Santos
Editór : Francisco Simões
