Ministru Agrikultura no Peskas, Joaquim José Gusmão dos Reis Martins. Imajen/Egas Cristovão

DILI, 10 jullu 2019 (TATOLI)-Ministru Agrikultura no Peska, Joaquim José Gusmão dos Reis Martins, ohin, hasoru malu ho Primeiru-Ministru (PM), Taur Matan Ruak, hodi atualiza planu orsamentál Ministériu Agrikultura no Peska (MAP) ba 2020 nian no simu mós orientasaun husi Primeiru-Ministru kona-ba saida mak hakarak atu foku loloos iha tinan oin, liuliu iha área agrikultura.

“Ita hakarak nafatin, hasa’e produsaun hare ho batar, mas depois iha fatór seluk mós Primeiru-Ministru fó atensaun atubele esplora didi’ak maka iha área pekuária liuliu hahán ba animál sira,” Ministru  Joaquim José Gusmão dos Reis Martins, relata iha Palásiu Governu.

Aléinde ne’e iha área peska nian tanba hafoin Fronteira Marítima, área tasi atu peska ne’e luan tan no ida ne’e sai mós preokupasaun no tau orsamentu uitoan atubele responde ida ne’e.

Iha área floresta liuliu ba iha kafé, Ministru Joaquim hateten, iha atensaun maka’as husi Primeiru-Ministru atubele foku iha área ne’ebé boot para bele haree nia rezultadu no mós planta industriál (ai sira ne’ebé iha valór ekonómiku).

Ministru Agrikultura hatutan, iha programa Governu nian to’o 2023 oinsá mak bele hasa’e produsaun foos lokál bele to’o porsentu 70 no porsentu 30 ba importasaun, sei halo esforsu boot atu atinje meta ida ne’e. Tanba ne’e, tenke hadi’a irrigasaun no mós adubu, mekanizasaun fila-rai ne’ebé di’ak para loke tan área kuda hare nian para atinje mehi ne’e.

Jornalista         : Maria Auxiliadora

Editór               : Francisco Simões

HAKEREK NO HATÁN

Please enter your comment!
Please enter your name here