Ministru Agrikultura no Peskas, Joaquim José Gusmão dos Reis Martins. Imajen/Egas Cristovão

DILI, 10 jullu 2019 (TATOLI)-Ministru Agrikultura no Peskas (MAP), Joaquim José Gusmão dos Reis Martins hateten, MAP sei aselera prosesu lelaun tratór ba iha patrimóniu estadu tanba prosesu lelaun tratór ne’e la´ós responsablidade MAP nian maibé ne´e patrimóniu estadu nia responsabilidade.

Daudaun iha 400 itál tratór  maka iha, maibé tratór sira ne’e kuaze kondisaun aat hotu ona tanba tratór hirak  ne’e dezde 2008.

Tanba ne’e, husi MAP rasik sei kontinua kumpre no asegura  Primeiru Ministru nia orientasaun atu halo lelaun ba iha tratór  sira ne’e.

“Ita presiza tempu oituan, tratór sira ne’e mós dezde 2008 kedas maka mai to’o iha ne’e, iha kondisaun barak maka laduun di’ak ona,  asegura nafatin primeiru ministru nia orientasaun i ami haree hela halo uma maka atu bele lelaun sira ne’e mós fazeadamente para ita labele mós fó fali ninia impaktu ne’e ba ita nian kondutór sira,” dehan Ministru Agrikultura no Peskas, Joaquim José Gusmão dos Reis Martins ba jornalista sira hafoin reuniaun Konsellu ministru iha Palasiu Governu, kuarta (10/07).

Tuir governante ne’e,  tratór sira ne’ebé maka kondisaun laduun di´ak husi MAP hamutuk ho patrimóniu estadu nia identifikasaun,  tinan kotuk konsege halo ona lelaun ba tratór hamutuk 56.

“Ita identifika hotu dezde tinan kotuk kedas, ita halo ona lelaun ba iha 56 tratór, maibé tanba haree kondisaun tratór sira ne’ebé maka iha ne’e foin maka leilaun rua de´it,” dehan Ministru Joaquim.

Kona-ba presu ba iha kada tratór ne´ebé atu halo lelaun, Ministru Agrikultura Peskas, Joaquim José Gusmão dos Reis Martins hateten, ne´e depende ba iha presu husi patrimóniu estadu maka sei tau tanba patrimóniu estadu maka halo prosesu leleiaun ne’e laos MAP nian responsabilidade.

“Lelaun ne’e patrimóniu estadu sira maka sei tau presu, ami sei la tau presu, ami fó ba patrimóniu estadu depois sira maka sei tau presu no halo lelaun,” dehan governante ne’e.

Hatan kona ba Primeiru Ministru nian deklarsaun ne’ebé  deklara katak tratór sira ne’e governu  sei entrga ba iha kompañia sira maka atu halo manutensaun,  governante ne’e  responde MAP sei halo estudu ba kestaun ne’e.

“Ita halo estudu. Ha´u rona dehan oras ne´e daudaun FAO (Organizasaun Nasaun Unida ba Ai-han no Agrikultura-red) mós halo hela estudu kona-ba makina sira ne’ebé maka atu halo manutensaun ne’e. Ita haree posibilidade halo nusa, se ida ne’e maka entrega ba setór privadu, ita mós haree kapasidade setór privadu sira atu bele jere tratór sira halo nusa,” dehan ministru ne´e.

“Karik haree maka iha, seidauk bele  ekilibriu, entaun ita mós bele konvida husi li´ur ne’ebé maka iha liu esperiénsia para bele serbisu hamutuk ho ita-nia setór privadu iha rai laran maibé kualidade nafatin ba iha ita-nia setór privadu rai laran,” akresenta Ministru Joaquim Gusmão.

Jornalista       : Natalino Costa

Editór             : Rafy Belo

HAKEREK NO HATÁN

Please enter your comment!
Please enter your name here