Reprezentante klube neen iha Primeira Divizaun LFA halo konferénsia ba imprensa kontra desizaun LFA muda kalendáriu jogu. Imajen Mídia LFA

DILI, 10 jullu 2019 (TATOLI)—Klube neen (6) ne’ebé dadaun ne’e hamahon-án iha Primeira Divizaun Liga Futeból Amadora (LFA), lamenta ho desizaun ne’ebé LFA hasai relasiona ho muda kalendáriu jogu hosi setembru ba outubru la fó koñesimentu ba klube sira.

Prezidente Académica FC, Gil da Conceição hateten, bainhira LFA halo mudansa kalendáriu liu semana ida ba leten, klube tenke hetan ona difikuldade.

Nia esplika, bainhira kontratu jogadór liu tempu ne’ebé determina, obriga sira tenke fakar osan ho montante ne’ebé boot nune’e bele selu jogadór no despeza klube aumenta ba beibeik.

“Ami hatama ona karta ida ba LFA kona-ba kalendáriu jogu. Loloos ne’e hotu iha setembru maibé sira prolonga tiha ba outubru mak termina. Ita hotu akompaña liga iha mundu. Laiha liga ida mak muda kalendáriu ka programa ne’e to’o dala tolu ne’e ami la simu,” tenik Gil liuhosi konferénsia imprensa ne’ebé hala’o iha salaun Xanana Sport Center, Bairru Formosa, Dili, ohin.

Nia afirma, LFA hola desizaun ruma labele mesak, maibé tenke konvida klube hotu partisipa hafoin foti desizaun. “LFA tenke bolu ami klube sira hotu mai tuur hamutuk hafoin ko’alia bele muda kalendáriu jogu ne’e ka labele,” nia realsa.

Iha fatin hanesan, Prezidente Assalam FC, Ipolito Soares afirma, bainhira LFA nafatin ho kalendáriu ne’ebé muda ona, sira sei la partisipa tan jogu kontinuasaun LFA. “Kuandu LFA nafatin mantein mak ami sei foti desizaun joga ami nian ramata de’it iha primeira volta. Ba segunda volta ami sei la joga, tanba ita haree despeza boot liu. Ami lakohi jogadór sira mai sisi fali ami,” katak Ipolito.

Klube neen ne’ebé lamenta ho desizaun LFA mak hanesan Karketu Dili FC, AS Ponta Leste, Atlético Ultramar, Académica FC, AD SLB no Assalam FC.

Antes ne’e, LFA pronúnsia ona kalendáriu jogu ba Primeira Divizaun sei hala’o durante fulan neen (6) hahú hosi abríl no termina iha setembru mai ne’e, maibé teki-teki muda fali ba outubru.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here