DILI, 10 jullu 2019 (TATOLI)-Operasaun konjunta ne’ebé envolve Polisia Servisu Investigasaun Kriminál (PNSIK), Unidade Polisia Maritima (UPM) no Polisia Leorema, kaptura ona suspeitu na’in 12 ne’ebé deskonfia envolve iha kazu omisídiu ne’ebé akontese foin lalais ne’e iha Aldeia Baura, Suku Leorema, Postu Administrativu Bazartete, Munisípiu Liquiça.
Akontesimentu ‘trájiku’ ne’ebé deskonfia envolve grupu juventude iha suku refere rezulta ema na’in rua (2) mate fatin, sunu uma 17 inklui sunu mós motor hitu (7).
Komandante Jerál Polisia Nasionál Timor Leste (PNTL), Komisáriu Faustino da Costa, informa, suspeitu sira ne’ebé kaptura nu’udar autór prinsipál ne’ebé halo ona identifikasaun klaru ba sira nia envolvimentu.
“Agora balun tama ona prizaun preventiva,” hateten Komisáriu Faustino da Costa, ohin, ba jornalista iha Kuartél Jerál PNTL, Caicoli, Dili.
Nia esplika, suspeitu sira polisia kaer liuhusi informasaun ne’ebé fó husi suspeitu ida ne’ebé antes ne’e polisia kaer uluk hodi ba hatudu suspeitu sira idak-idak nia hela fatin iha Aldeia Baura.
Komandu PNTL mós monta ona postu polisia temporáriu iha fatin akontesimentu hodi evita kontinuasaun konflitu ne’ebé bele perturba orden públiku no halo komunidade moris lahakmatek.
“Ita nafatin koopera ho autoridade lokál para re-integra fila-fila komunidade ne’ebé refúijia ba Liquiça para mai fali sira nia hela fatin,” hateten Faustino da Costa.
Jornalista : Eugénio Pereira
Editór : Francisco Simões
