Espoza Primeiru-Ministru (PM), Taur Matan Ruak nu’udar mós Fundadora Sentru Quesadip Ruak (CQR-sigla portugés), Isabel Ferreira. Imajen/Espesiál

DILI, 10 jullu 2019 (TATOLI)–Espoza Primeiru-Ministru (PM), Taur Matan Ruak nu’udar mós Fundadora Sentru Quesadip Ruak (CQR-sigla portugés), Isabel Ferreira, konsidera, inan feto ne’ebé hamutuk ho nia kaben komete kazu lori droga ba Kupang-Timor Osidentál (NTT-sigla indonézia) la sala no inosente tanba nia tuir de’it nia la’en atu halo viajen ba Kupang.

Autoridade Indonézia, kuarta (29/05/2019), prende kazál timoroan ho inisiál JSP ho AS iha fronteira Mota-Ain, Belu, Timor Osidentál (NTT-sigla indonézia), bainhira lori droga atu ba fa’an iha Kupang.

Evidénsia ne’ebé autoridade Indonézia foti husi kazál timoroan ne’e, kompostu husi ai-moruk droga musan 4.874 ne’ebé tetu hamutuk grama 1,861.

Informasaun ne’ebé Isabel Ferreira simu katak, inan feton ne’e la sala tanba iha indísiu forte katak inan feton ne’e akompaña deit nia kaben (nia katuas oan) atu ba Kupang-Indonézia).

Isabel Ferreira afirma katak, hanesan espoza Primeiru-Ministru no nu’udar inan ida, preokupa mós tanba sira na’in rua sidadaun TL, labarik na’in tolu ne’ebé mak mesak no sei ki’ik hotu, presiza inan ka aman nia akompañamentu ba futuru oan sira nian.

“Ha’u hanesan jurista, ativista ba direitus umanus iha programa rasik atu apoiu família sira iha situasaun sira nee. Ami mós halo hela aproximasaun ho autoridade Estadu Timor Leste nian ho Indonesia nian atu buka defeza di’ak husi TL no Indonesia hodi próteze sira na’in rua liuliu nia kaben feto,” hateten Isabel Ferreira, ohin, ba Ajénsia TATOLI iha Bairru-Pite, Dili.

Tanba akompaña deit nia katuas oan ba Kupang, Isabel Ferreira esplika, laiha provas ba iha autoridade justisa Indonézia atu detein no aplika pena morte (hukuman mati)

Nia afirma mós, maske TL ho Indonézia laiha akordu estradisaun, maibé Estadu no timoroan sira tenke fó apoiu ba sira na’in rua, tanba nee sei buka advogadu ne’ebé mak di’ak atu akompaña no defende sira tanba sira mós iha direitu atu hetan protesaun husi estadu.

Nia hatutan, husi TL akompaña nafatin liuhusi investigasaun no buka dadus atu back up defeza Indonézia no TL atu bele defende sira na’in rua liuliu ba kaben feto.

Jornalista  : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here