Reprezentante OMS iha Timor-Leste, Rajesh Pandav, halo intervensaun iha formasaun ba profisionál saúde sira kona-ba hapara tabaku iha Timór-Leste. Imajen Mídia OMS

DILI, 10 jullu 2019 (TATOLI) – Institutu Nasionál Saúde  (INS) servisu ho Organizasaun Mundiál ba Saúde (OMS) kapasita  Profisionál Saúde (PS) liu hosi formasaun durante loron tolu hodi prevene no kontrola tabaku iha Timór-Leste.  

“Objetivu hosi serimónia ne’e hasa’e liután profisionál saúde sira nia koñesimentu no abilidade atu identifika no halo diagnóstiku, akonsellamentu no terapéutiku liga ba prevensaun no kontrolu tabaku iha Timór-Leste”, Diretora Ezekutiva Interina INS, Maria Soares, ba jornalista sira iha salaun JL Vila, Fatuhada, ohin.

Partisipante iha atividade ne’e médiku, parteira, enfermeiru, no tékniku aliadu hotu ne’ebé maka sai fornesedór iha saúde kuidadu primáriu para presta saúde ne’ebé di’ak liu ligadu ba kontrolu tabaku.

“Hosi ministériu saúde halo advokasia para oinsá haree prevensaun ba tabaku, li-liu ba ema sira ne’ebé fumadór, atu labele hetan moras”, katak tan.

Reprezentante OMS iha Timór-Leste, Rajesh Pandav, hateten PS nia papél iha prevensaun  liuhusi edukasaun no komunikasaun, terapia farmakolójika, tratamentu klíniku para fuma.

“Profisionál saúde sira iha oportunidade atu ajuda ema muda sira nia hahalok liu husi fó konsellu, orientasaun no responde sira nia pergunta ne’ebé relasiona ba konsekuénsia husi uza tabaku”, afirma tan.

Profisionál saúde sira mós bele dezempeña papél predominante iha medida preventiva, liu-liu ba foin-sa’e sira, labarik no adolexente liuhusi fó avizu kona-ba tabaku nia perigu, katak tan.

Lideransa másimu OMS iha Timór-Leste ne’e afirma estudu hatudu ona maske iha de’it konsellu badak husi PS kona-ba perigozu husi fuma no importánsia para fuma mak métodu kustu efetivu liu hodi hamenus fuma tabaku.

Profisionál sira, nia dehan bele utiliza sira nia influénsia iha komunidade lokál no nasionál hodi enkoraja hatuur medida preventiva ba kontrola tabaku.

“Presiza tebes atu kria programa ida ba hapara tabaku iha Timor-Leste, razaun hirak tuir mai ne’e; prevalénsia aas ba fumadór, iha adultu sira idade 18 to’o 69 no iha adolexente sira. Estrutura demografia ba foin-sa’e sira ne’ebé hatudu %74 husi totál populasaun ho idade menus husi 35, indika maioria husi fumadór sira iha idade foin-sa’e”.

Rajes haklaken evidénsia hatudu kuaze fumadór sira hotu hakarak para fuma, partikularmente sira hatene kona-ba perigu hirak ne’ebé kauza husi fuma tabaku.

Timór-Leste nian, Peskiza Global kona-ba tabaku iha foin-sa’e hatudu estudante mane %70 no feto ho %57 mak fuma loron-loron. Relata, sira iha intensaun atu para husi fuma, maibé karakterístika husi nikotina, difisil tebes ba ema barak atu para husi fuma kuandu laiha forma ba asisténsia balun.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here