Sekretáriu Estadu ba Formasaun Profisionál no Empregu Julião da Silva, Imajen/Egas Cristovão

DILI, 10 jullu 2019 (TATOLI)-Sekretáriu Estadu Formasaun Profisionál no Empregu (SEFOPE), Julião da Silva, informa, Governu seidauk indika grupu ida atu halo rekrutamentu ba traballadór timoroan atu bá serbisu iha li’ur.

“Ba futuru mak iha ona ajénsia timoroan ruma mak hakarak ona tenke bá rejistu iha Ministériu Justisa no hetan baze legál forte ona, para buat ruma ita hatene mak nia, mas agora, kanál mak SEFOPE de’it,” informa  Julião  da Silva,  ohin, iha Caicoli, Dili.

Sekretáriu Estadu Julião da Silva, relata ida ne’e tanba deskonfia iha grupu ne’ebé halo rekrutamentu ilegál ba traballadór sira no iha tempu badak hamutuk ho Polísia Sientífika Investigasaun Kriminál (PSIK) sei halo investigasaun ba grupu ne’ebé durante ne’e deskonfia halo rekrutamentu ilegál.

“Ema li’ur mak halo, ema ne’e ami hetan ona, keixa tama ona,” Julião dehan.

Hatán sobre envolvimentu funsionáriu SEFOPE nian ba atividade ne’e, Julião dehan, nia lahatene, maibé nia halo ona karta ba Polisia Sientífika Investigasaun Kriminál (PCIC-sigla portugés)  no hetan ona resposta, nune’e iha tempu badak sei tun bá tanba ema ne’e iha Dili.

Husu sobre grupu ne’e haruka ona timoroan bá serbisu, Julião dehan, hein investigasaun, maibé buat ne’ebé rona katak grupu ne’e mak garante ema bá Austrália.

“Sira garante ema sira tuir serbisu sazonál ne’e sei bele liu. Lojikamente ne’e kuandu liu tanba nia halo rede iha SEFOPE laran, mas ami la preokupa rede ne’e sé, preokupa mak vítima ne’e tanba foti nia osan. Vítima ne’e iha na’in-sanulu-resin, ema ida dehan fó osan  $500 para bá Austrália”.

 Julião hatutan, sei halo investigasaun ba grupu ne’e atu hatene loos ka lae halo ida ne’e.

Jornalista         : Maria Auxiliadora

Editór               : Francisco Simões

 

HAKEREK NO HATÁN

Please enter your comment!
Please enter your name here