Fundadora Sentru Quesadip Ruak (CQR-sigla portugés), Isabel Ferreira, ko'us hela bebé ne'ebé foin lalais inan musik hela hafoin partu. Imajen/Domingos Piedade Freitas

DILI, 10 jullu 2019 (TATOLI)–Fundadora Sentru Quesadip Ruak (CQR-siglaportugés), Isabel Ferreira, ohin, halo vizita ba família bebé ne’ebé inan husik hela hafoin partu.

Iha semana hirak liu ba, públiku preokupa ho kazu inan husik hela bebé ida iha Aldeia Teka Laran, Suku Lahane, Postu Administrativu Vere Cruz, Munisípiu Dili.

Bebé ne’e hetan husi tiu Mario Nunes Sarmento hodi lori ba ospitál para hetan tratamentu, maibé derrepente de’it família sira reklama hikas bebé ne’e no ikus mai prosesu ne’e to’o iha Tribunal hodi deside bebé ne’e tenke fila ba nia inan tanba bebé presiza susu.

“Kazu ne’e sai ona segredu públiku. Hotu-hotu akompaña katak nia inan duni mak husik hela bebé mane oan ne’e. Ha’u mai vizita bebé ho família hodi fó konsellu ba bebé nia inan atu kuidadu ninia bebé no sai fali inan di’ak ba bebé ne’e,” hateten Espoza Primeiru-Ministru, Taur Matan Ruak ne’e ba Ajénsia TATOLI.

Nu’udar Sarani Kristaun Katóliku, Isabel Ferreira, fó hanoin nafatin ba bebé nia inan, inklui família hotu atu iha korajen  enfrenta dezafiu moris ohin loron nian.

“Moris iha mundu hasoru problema oi-oin, ita tenke simu tanba moris iha família buat hot-hotu, la’ós iha rozas nia leten, maibé dalaruma moris iha ai-tarak nia leten, kuandu monu ba sala koko atu hamriik fila fali,” afirma Isabel Ferreira.

Espoza Primeiru-Ministru ne’e, husu mós ba família husi inan feton ne’e nian atu simu fila-fali  nia hodi hamutuk kuida bebé mane oan nee.

Nia parte husu mós ba bebé nia mama atu brani ko’alia sai kona-ba sé mak sai aman ba bebé ne’e. Nune’e, mane refere bele hola responsabilidade ba nia aktu no labele halo feto sira sai vítima beibeik ba mane sira nia hahalok.

Isabel Ferreira  husu ba família sira atu perdua bebé nia inan no ajuda nia atu sai inan ne’ebé mak di’ak, tanba  bebé nia inan ida ohin la’ós ona hanesan bebé nia inan ida horiseik

“Aprende husi buat ne’ebé sala, hodi sai inan ne’ebé diak, atu aban bainrua nia moris di’ak liu,” hateten Isabel Ferreira.

Iha fatin hanesan, Alicia da Conceicão nu’udar  inan boot husi bebé nia inan ne’e  hateten, moris iha mundu nee, labele ultrapasa buat ne’ebé di’ak de’it, maibé mós agradese karik problema ruma hasoru família ida.

“Ha’u hanoin sakrifisiu ida nee, ema ida ka rua mak halo, la’ós ema hot-hotu halo ida nee, ami família simu oan nee ho haraik aan, ksolok no hakne’ak tanba nu’udar kosok oan ida iha família nee,” Alicia hateten.

Lori família nia naran, Alicia hato’o agradese ba Maromak, liuhusi Espoza Primeiru-Ministru ho Defensor Públiku, Estaquio Guterres, tanba mai vizita no motiva família sira iha tempu susar no difisil perante públiku nia oin husi akuzasaun oi-oin.

Hatán kona ba aman ba labarik nee, Alicia konfesa katak, família loke ona  prosesu ba Ministériu Públiku atu bele kontaktu mane ne’ebé família identifika ona  hodi responsavel ba ninia aktu tuir dalan justisa nian.

Jornalista  : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here