Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 10 jullu 2019, (TATOLI)- Ministru Agrikultura no Peskas (MAP), Joaquim José Gusmão dos Reis Martins hateten, dadaun ne´e ezekusaun Orsamentu Jerál Estadu (OJE) tinan 2019, iha Ministériu Agrikultura no Peska foin atinji 20% tanba atrazu iha aprovizionamentu.

“Ha’u seidauk iha up date maibé talves ezekusaun orsamentu ba Ministériu Agrikultura foin atinji pursentu 20 itál,” dehan Ministru Joaquim Gusmão ba jornalista sira hafoin partisipa reuniaun Konsellu Ministru iha Palasiu Governu, kuarta (10/07).

Nia hatutan, ezekusaun orsamentu ba MAP iha atraza uitoan, tanba atraza iha prosesu aprovizonamentu. Iha prosesu aprovizonamentu ne´e osan boot tan ne’e maka kuidadu tebes atu hasai. Mas depois fulan jullu agora, governante ne’e espera  prosesu ezekusaun OJE ba MAP sei sa’e maka´as.

Governate ne’e haktuir tan katak orsamentu ne´ebé maka MAP foin atinji 20% ne´e ezekuta ba iha programa parte agrikultura nian hanesan fini nian ne’ebé maka foin submete ba iha aprovizionamentu no iha área peskas nian ne’ebé daudaun ne’e la´o uitoan no pekuária.

Enkuantu, hatan kona-ba orsamentu ba iha Ministeriu Agrikultura no Peskas iha tinan oin preve hira, Ministru Agrikultura no Peskas Joaquim José Gusmão dos Reis Martins hateten, dadaun ne’e seidauk simu pakote orsamentu tinan oin.

Maibé proposta orsamentál ne’ebé husi MAP prepara ba tinan oin maka sei  tau osan hamutuk hotu ho osamentu fundu ba infraestrutura nian hodi haree  liuliu ba irigasaun sira ne’ebé maka atu tau osan atu haree.

“Ida ne’e, ami prepara atinje 100 ital milloes maibé ita haree fila fali to´ok ba ita-nia kapasidade orsamentasaun governu nian,” dehan governante ne´e.

Jornalista: Natalino Costa

Editór      : Rafy Belo

HAKEREK NO HATÁN

Please enter your comment!
Please enter your name here