Polísia halo pasarevista ba karta kondusaun no dokumentu mikrolete. Imajen espesiál

DILI, 9 jullu 2019 (TATOLI)—Diresaun Nasionál Transporte Terrestre (DNTT) sei hanaruk durasaun karta kondusaun no xapa matríkula provizória bainhira karta kondusaun orijinál no xapa matríkula orijinál seidauk produzidu.

“To’o fulan neen mak blanku seidauk iha, entaun ami sei hanaruk durasaun karta kondusaun no xapa matríkula provizória. Se lae, bainhira kondutór ka motorista sira halo sirkulasaun iha estrada públiku, polísia bele kaptura sira,” Diretór Nasionál Transporte Terrestre, Natalino do Rosario ba Agência Tatoli, iha nia kna’ar fatin, Balide, tersa (9/07/2019).

Natalino haktuir, iha tinan ne’e, tuir loloos diresaun hakarak kompra blanku karta kondusaun hamutuk rihun 50 no mós blanku xapa matríkula, maibe tanba orsamentu ba tinan 2019 nian ba asuntu ne’e rihun 24 de’it, entaun la to’o.

“Ita hotu hatene katak komesa tinan kotuk, motorizada ne’ebé nia xapa matríkula ho kódigu L hamutuk rihun 7 resin ba leten ne’e la’o ho xapa matríkula provizóriu no mós kareta nia xapa matríkula ho kódigu A-18,” nia haklaken.

Diretór ne’e fó hanoin katak prosesu ba iha blanku karta kondusaun no xapa matríkula nian prosesu konkursu ne’e la’o hela iha Ministériu Transporte no Komunikasaun. Hein de’it atu anúnsia kompañia ne’ebé mak pasa atu prodúz  sasán refere.

“Ha’u hanoin, kompañia ne’ebé pasa iha konkursu,  iha tempu badak ka fulan ida ne’e nia laran,  bele supply mai iha Diresaun Nasionál Transporte Terrestre atu bele distribui ba ita-nia kondutór sira no motór na’in sira,” Natalino tenik.

Jornalista: Nelia Fernandes

Editór: Xisto Freitas

Lee mós notísia ida ne’e: http://www.tatoli.tl/2019/07/konkursu-ba-blanku-karta-kondusaun-no-xapa-matrikula-final-ona/

HAKEREK NO HATÁN

Please enter your comment!
Please enter your name here