Prezidente Parlamentu Nasionál, Arão Noe de Jesus Amaral. Imajen/António Goncalves

DILI, 10 jullu 2019 (TATOLI)—Prezidente Parlamentu Nasionál, Arão Noé de Jesus da Costa Amaral hateten pakote aleterasaun lei haat Fundu Petrolíferu (FP) nian ne’ebé nia simu ona hosi Governu iha tersa (9/07) tuku 18:00 otl, haruka ona ba Divisão de Apoio a Plenaria (DAP) hodi prepara nota téknika.

“Ha’u haruka ona pakote lei haat ne’e ba DPLAN para sira bele prepara nota téknika. Ha’u fó tempu ba sira to’o ohin (kuarta) atu lalais prepara pareser tékniku hodi entrega fali mai ha’u nune’e ha’u bele informa ba líder bankada sira,” tenik nia iha Parlamentu Nasionál (PN), ohin.

Nia dehan, depois simu pakote lei haat hosi Ministru Reforma Lejizlatura Asuntu Parlamentár (MRLAP), Fidelis Manuel Leite Magalhães, PN toma kedas konsiderasaun hodi halo rejistu koloka iha ajenda.

Ema dahuluk iha órgaun soberanu daruak ne’e hatutan katak maski simu ona pakote lei haat Fundu Petrolíferu (FP) nian ne’e, maibé seidauk iha desizaun ida bainhira mak atu halo debate tanba presiza rona uluk líder bankada sira.

“Desizaun debate ne’e líder bankada sira mak sei fiksa depois mak Komisaun A sei hasa’e mai plenária hodi diskute no aprova iha jeneralidade no mós espesialidade. Posibilidade boot semana ida ne’e, komisaun bele prepara ona relatóriu no pareser,” nia esplika.

“Ami hein buat hotu bele la’o di’ak nune’e bele kumpri kalendáriu ne’ebé Governu Timor-Leste no Austrália desidi ona katak 30 agustu bele tama ona iha vigór ratifikasaun tratadu delimitasaun Fronteira Marítima,” Arão salienta.

Jornalista: Tomé Amado

Editór: Xisto Freitas

Lee mós notísia tuir mai ne’e: www.tatoli.tl/2019/07/ppn-konvida-deputadu-sira-prepara-debate-lei-haat/

http://www.tatoli.tl/2019/07/governu-submete-ona-proposta-lei-haat-ba-parlamentu-nasional/

HAKEREK NO HATÁN

Please enter your comment!
Please enter your name here