DILI, 10 jullu 2019 (TATOLI)-Sekretáriu Jerál Konsellu Nasionál Justisa Brazíl, Carlos Vieira Von Adamek, ohin, hasoru malu ho Prezidente Repúblika, Francisco Guterres Lu Olo, hodi informa kona-ba kooperasaun no interese Brazíl nian atu apoiu dezenvolve setór justisa, liuliu iha jestaun administrasaun prosesuál.
Carlos Viera Von Adamek, hateten, Brazíl iha kapasidade iha area dijitalizasaun no informatizasaun hodi hametin jestaun administrasaun prosesuál ne’ebé bele oferese ba Timor-Leste.
Brazíl mós hatudu nia laran luak atu hametin liu tan kooperasaun ho Timor Leste tanba nasaun rua ne’e mós hola parte iha grupu amigu nasaun ko’alia lian portugés (CPLP-sigla portugés).
Carlos Viera Von Adamek aprofunda katak, governu Brazíl sei halo doasaun ba ekipamentu hanesan komputadór 100 no tékniku na’in rua ne’ebé iha peritu iha área informátika atu hametin justisa lokál Timor Leste nian.
Komunikadu imprensa ne’ebé Ajénsia TATOLI asesu, ohin, relata mós katak Sekretariu Jerál Konsellu Nasionál Justisa Brazíl ne’e, rekoñese iha área balun iha setór justisa nasaun rua iha diferensa, maibé kooperasaun ne’e hanesan mós oportunidade atu nasaun rua aprende ba malu.
Misaun Ajénsia Kooperasaun Brazileira ka Agencia Brasileira de Cooperacão (ABC) no Konsellu Nasionál Justisa Brazíl mai Timor Leste iha ámbitu projetu apoiu fortalesimentu kapasidade institusionál ba Tribunál Rekursu Timor Leste, hahú ona iha loron 8-12 jullu, tinan ne’e. Liuliu kona-ba hametin sistema informátika Tribunál Rekursu, kapasitasaun tékniku lokál iha teknolojia informasaun, apoiu jestaun administrativa no lingua Portugés.
Jornalista : Agapito dos Santos
Editór : Francisco Simões
