Prosesu rekrutamentu ba traballadór timoroan ne’ebé halo husi empregadór sira husi Austrália. Imajen/SEFOPE.

DILI, 10 jullu 2019 (TATOLI)-Sekretáriu Estadu Formasaun Profisionál no Empregu (SEFOPE), Julião da Silva, informa, ajénsia balun husu ona traballadór timoroan ba programa Pacific Labour Scheme (PLS), tanba ne’e, SEFOPE mós hahú ona halo rekrutamentu.

“Ita rekruta hela para tama iha kategoria waiting list para sira liu rekizitu, tama iha lista ida hein tanba iha ajénsia sira komesa request (husu) mai ona para foti, balun iha 20, balun 50 no balun 100,” informa  Sekretáriu Estadu Julião da Silva, ohin, iha Caicoli, Dili.

Nia esplika, hahú ona prosesu rekrutamentu para ema hotu tama iha lista, nune’e bainhira kompañia sira mai ne’e foti de’it naran sira iha lista no halo teste ba ikus nian.

Julião da Silva informa, empreza ne’ebé hahú ona rekruta timoroan mak husi Vitoria, Austrália, ne’ebé serbisu iha área prosesamentu na’an nian.

Serbisu iha programa PLS ne’e tanba presiza ema kualifikadu maka Julião dehan, tenke iha nivel inglés di’ak, esperiénsia uitoan no abilidade ne’ebé di’ak tanba ida ne’e diferente ho serbisu sazonál no viza bá serbisu ne’e tinan ida to’o tolu.

SEFOPE ne’e dehan empreza seluk sei mai tan no ba rekrutamentu nian empreza rasik mak halo no SEFOPE ajuda organiza no rekolla dadus.

Tuir publikasaun pájina SEFOPE nian, horisehik, Sekretáriu Estadu akompaña prosesu teste fíziku no orál ba kandidatu traballadór sira ne’ebé atu bá serbisu iha Austrália tinan tolu liuhusi programa PLS, ne’ebé realiza iha sentru formasaun Tibar.

Teste fíziku no orál ba programa PLS fó diretamente husi na’in ba kompañia husi Austrália ne’ebé sei bá serbisu iha área prosesamentu na’an, no prosesu selesaun ba programa PLS sei la’o hela tuir rekizitu ne’ebé iha.

Jornalista         : Maria Auxiliadora

Editór               : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here