Prezidente Promosaun no Venda LFA, Janio Tilman (faru metan liman karuk).

DILI, 10 jullu 2019 (TATOLI)—Liga Futeból Amadora (LFA) liuhosi Diresaun Marketing bainhira husu tulun ba kompañia nasionál-internasionál sira iha Timor-Leste, konsege iha kompañia neen mak dadaun ne’e tulun ona liga hodi hala’o jogu époka da-haat.

Maski nune’e, parte LFA loke nafatin odamatan ba kompañia sira seluk iha Timor-Leste bele sai patrosinadór nune’e bele ajuda futeból la’o di’ak liu.

“Ami apresia no agradese ba patrosinadór hirak ne’ebé durante ne’e apoiu ona Liga durante LFA hamriik besik tinan haat (4).  Hakarak dehan apoiu hotu-hotu ne’e la’ós mai de’it hosi Governu, maibé tulun mós hosi Federasaun Futeból Timor-Leste (FFTL) no patrosinadór sira,” tenik Prezidente Promosaun no Venda LFA, Janio Tilman liuhosi konferénsia imprensa ne’ebé hala’o iha salaun Xanana Sport Center, Bairru Formosa, Dili, ohin.

Janio esplika, apoiu hirak ne’ebé patrosinadór sira fó ba LFA iha époka dahaat mak hodi ajuda ona atividade hotu ne’ebé realiza hanesan jogu Primeira Divizaun ne’ebé la’o ona to’o jornada 5, jogu Segunda Divizaun ne’ebé termina ona fulan kotuk no jogu Taça 12 de Novembro ne’ebé la’o hela.

Patrosinadór hirak ne’ebé tulun ona LFA mak hanesan, ETO+, Gota, Bintang, Sumus Amigo, BLK no Folsom no Perisos.

“LFA hatama hela proposta lubuk ida maibé sei iha hela prosesu konsiderasaun nia laran tanba ita hotu hatene impase polítika 2017-2018 to’o agora sei kontinua hela. Tanba ne’e mak ami dehan dokumentu hirak ne’ebé ami submete ona ba kompañia sira sei iha hela prosesu nia laran,” Janio haktuir.

Enkuantu, fundu ne’ebé mak kompañia fó ba LFA konfidensiál. Fundu ne’ebé kompañia oferese ba LFA tinan ida ne’e ki’ik liu kompara ho tinan hirak liu ba kotuk. Maski fundu ne’ebé ki’ik, LFA konsege jere ho di’ak hodi prodúz logo kompañia sira nian no metade tulun atividade liga.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here